قديم × جديد ( حط في شوالك ) .

يلويني ارياف انجيك ... واندير يوم يا دار القدم .
انموت ويدفنوني فيك... وصيت هلي يادار القدم .
داووني خذوا في لجر... جارحيني اقدم يا اجدد .
انكان ما بغيض بلاش ... على قديم ياعين البكا.
انهالي بحيل اجهدك ... فرقا قديم ياعين موشوي.
بعيد يالجديد عليك ... مملوك ملك راني للقدم .
نحساب الجديد لهاك ... بندر قديم جيتي تمدحي.
اول العمر راح رياح ... تلافوا عقابه ياقدم .
ما القيت درب ايشيل ... منك بعيد يادار القدم .
لو اشحاته ولو منهوب ... وارثينه غلاكم يا قدم .
قديم راهنه ياعين ... عشمي فيه ما زال ما اغني .
هويت قلت جاها نوم ... هفوا قديمين قنبرت .
عليما جديد انظرت ... طريق ما عطينا فالقدم .
جميع من ايجي ساوال ... ينشد امنيش قولوا مالقدم .
وجعتم الجدد كي قلت ... انموت والقدم قاهريني .
رماني عليك ارياف ... مجبور جبر يادار القدم .
حتى والجديد احذاي ... مسروق ركن عيني للقدم .
انخاف يالجديد عليك ... ننساك من مهايات القدم .
واليوم بجديد امطرت ... فكن اجداب صوبي لولي .
اسكبت لا رعد لا غيم ... مزنة العين في دار القدم .
درتي جديد ما هنوك ... كنهم امعاك ياعين القدم .
قديم قال ما انخطاك ... انجاك نوم راني جايك .
منين ما انشيل انظري ... نلقا قديم ماليني غلا .
نمشيلك انجي بريان ... دواي فيك يادار القدم .
لدار القديم اسبقن ... وبالقايد انظاري عاودن .
واخيرا :
ميزان القديم قديم ... يردح بثقل مازال ما ركح .

يامانك شايل
صبار ثاريتك
وين هضا كله
اشكرك .... اشكرك ......اشكرك

بأذن الله جديدك ***شاطر يمسح كل جروح الخاطر

منور ياكابتن ... لكــــــــــــــــــن :
الكبــــــــــد في الرحــــــــا حاطين * يطحن جديد ويهاجو اقدم

ان شاء الله يامهندس جديدي شاطر.

ميت لي زمان دفنتا ____صوب قديمين اتعيش انت

تقبل مروري

يوم بيوم العمر امجبي ... وانت فيت اقدم ما تبي

لو اشحاته ولو منهوب ... وارثينه غلاكم يا قدم

تحياتى ومشكور

اتعلق في جديد ايام واتعاود اتهاتي بـ القدم
وشكراً يا غالي..

مسّع يا القديم القينا كيفك نين اتهون علينا

مشكور يا غالى على ما طرحت

حالف ماندير جديد ......... علي قديم كبدى ذايبه

إن قلت أنسيتك يالقديم ...أنوهم في روحي توهيم

بلاش باعها القديم...وهي عليه يا مابايعه