ليش كل ماجيت لدار

ليش كل ماجيت للدار * يخطر اللي اليوم غايب

ونردد ف قول شعّار * ياعازتي ف الحبايب

وانهاتي امهاتاة سكّار * مايقول في قول صايب

ونطلق العين تنهار * سماها بلا مزن عايب

ويرد عقلنا شور تذكار * وما يقدعنّه هزايب

ونا عارفه موش صبّار * رقيق عزم مليوع ذايب

نهيته عليك يا دار * غير ما اردعنّه كتايب

ان جاب سيرته ايجيك منهار * وفي جرّته الياس جايب

وهو يعزق ادلاه ف ابيار * وينشل امغير ف الهزايب

عندي العقل امعاي مكّار * نحسابه الا اليوم تايب

ثاريه مازال كرّار * احبال سوّهم موش هايب

ويمدح مع كل بندار * مذهوب شيرته م الحبايب

وشاورت بو راي دبّار * ف الهَود , مانفعن طبايب

خلاص قلت صار ما صار * ياالعقل خليك سايب

انت اليوم مليوع من نار * افلانة وما زلت خايب

اسّاع ينفعك جبد لقهار * لا عند نلفاك شايب

خطرها الا ذكر موكار * ان جيته ايجنّي مصايب

موحش وما يجوه خطّار * ومجدب وماله صحايب

تركوه ناساً اكبار * سمّوهم اصحاب النجايب