تحزمت بيكم نحسابكم في صفوفي

من طرف **العاشق الصغير** الجمعة 11 مايو 2012, 7:01 pm

تحزمت بيكم نحسابكم في صفوفي
ربيتكم في حجري رقيتوا كتوفي
تحزمت بيكم............

تحزمت بيكم قلت كيف حلاطي*
وايام الرفقة دقرة* ناسفها ف باطي

وذكريات الماضي علف* معبي أمشاطي*
واجد ملّغم حاشي جميع طروفي

وأيامنا الصعيبة ذرع بيه أنلاطي
وايام زهانا تمن هذين سيوفي

غيرسيفي قسمي عند ماهو خاطي
ويا دقرتي نحسابك علي تروفي

الشين عهديني م اليوم عليه تواطي
وذيل العرب يا عين ما عاد تشوفي

صحيح لمأصل ما كيف الواطي
والصقر ما يصاحب اللي مسكوفي*

والبحر يطرد في الوسخ للشاطي
ونا كيفا نطرد في الوسخ من جوفي

ــــــــــــــــــــــــــــــــــــــــــــــــــ ــــــ

تحزمت بيكم قلت تبوا جبهة
ومن هبلي أنراجي في سمك من سبها

وأن جتني الشينه أنقول توا تبها
تجوني بشينة جديدة نوفي

والصبر عليي عاصية يكلبها
وعارفك يا عين ما تريدي تشوفي

ناس من معطن اللئم مشربها
طلق الله طرفك كان تريدي أتعوفي

ناس لقت عندي اللي تطلبها
ولا ذكروا جميلي ولا معروفي

ــــــــــــــــــــــــــــــــــــــــــــــــــ ــــــــــــــ

تحزمت بيكم غير حيه عليا
من عطبة بخيتي تحزمت بحية

لاني لكم صراحة لانتوا ليه
انتوا لكم ظروف ونا ليا ظروفي
________________________________
تحزمت عديتكم قرعتي ومنابي
"تحزمت بدري"لما عليكم عابي
نا بيدي نطلع فيكم انتوا غابي
أزعمة وايش نطلع مع لخررين ياخوفي؟؟؟
ــــــــــــــــــــــــــــــــــــــــــــــــــ ــــــــــــــــــــــ
* الحلاط \ ما يتشح به الفارس البدوي لوضع الطلقات
*الدقرة\ البندقة الطلياني القصيرة
*العلف\الذخيرة
*الامشاط \ امشاط الذخيره أيضا
المسكوفي \ نوع من الاوز
ــــــــــ
م ن ق و ل