صلى عليك الله

من طرف **dude333** 2024-10-30, 12:39 pm

صلى عليك الله :: يا تاج راسي :: يا رسول الله :: والملائكة صلى عليك الله

صلى عليك اللي عزيز قدير :: والملائكة صفّاً وخير نصير

يا بال من جيته بشير نذير :: وهو قبل غارق في الهوى وبلاه

عليك كل من صلى مقام كبير :: ينال عند ربّه وين ما ناداه

وعليك كل من صلى انْ كان فقير :: سعيد حظ في الدنيا وفي مثواه

وعليك كل من صلى إنْ كان ضرير :: ينال أجر ويعجّل الله بشفاه

وعليك كل من صلى بنظاف ضمير :: وين ما طلب ربّ العباد عطاه

وعليك كل من صلى بلا تحكير :: ينال الرضا والعفو من مولاه

ونا عليك لازمني قصيد اندير :: وجنّي وصايا مو مغير وصاه

في علو شانك من أصحاب الخير :: اللي من أتباعك يا حبيب الله

اللي هذا شجعني على التعبير :: ونا لمن ايحبك ما انخيب جاه

......................... صلى عليك الله .........................

صلى عليك اللي كريم ودود :: والملائكة صلوا عليك احشود

بكونك علي خلقً عظيم وزود :: متوكل علي ربّك ونلت رضاه

طلبت الشفاعة من كريم الجود :: في كل مؤمن لك عليه عناه

من دون الانبيا صفك يجي مسنود :: بقول امتي لله في علياه

ونا يا حبيبي ما نكون جحود :: وانت شفيعي ما عليك غناه

انكاني امقصّر والسلف مردود :: يوم الحساب اللي شديد صناه

يوماً الوالد يهلب المولود :: ويهلب اللي قضّت العمر معاه

والخوت والولدين راس الرّود :: اللي هذا يبحث له علي ملجاه

يوم فيه لا ناشد ولا منشود :: والعذر غايب ما هناك لغاه

امفيت قول نفسي بس يا معبود :: يا خالق تغفر الذنب أمحاه

راني امثقّل والظهر مقنود :: وما خاب ظنّ اللي عليك اعباه

......................... صلى عليك الله .........................

صلى عليك اللي عليك وكيل :: والملائكة لا كذب لا تدجيل

هذا في كتاب الله خير دليل :: واللي ما قرا يصفّحه يقراه

ومذكور في التورات والانجيل :: من قبل يظهر ع الوجود نباه

أسمك الغالي جيل يارث جيل :: وهو في القلوب الصافية مرساه

ونا فيك ما عندي جرام جميل :: انصلي عليك صلاه خير صلاه

صلاة في الفجور وفي عقاب الليل :: صلاة امحب علي حبيب شهاه

صلاة من الصميم وهيل ما هي كيل :: اعداد ما تعلّت شمس كل ضحاه

صلاه كي ما امرنا بها الجليل :: اللي النور نوره ونهتدوا بهداه

واللي قال عدّوا من رباط الخيل :: الهم نين تنتصروا على الطغاه

وهو اللي قطع دابر أصحاب الفيل :: ومنهم البيت اللي عتيق حماه

وين ابرهه حشّد بجيش ثقيل :: وجاب الأفيال ربنا فاجاه

بطيراً أبابيلاً ومن سجيل :: ترميه بحجاره هي أسباب فناه

......................... صلى عليك الله .........................

صلى عليك اللي قوي جبّار :: اللي حماك من الكفار والأشرار

ببيت عنكبوت وانت وسط الغار :: وما يمنعك من كيدهم لولاه

وكيف قالك بوبكر ما الاخبار :: له قلت لا تحزن ولا تخشاه

حتى لو علينا ضيقوا الحصار :: معانا الله بجيش ما تراه

ترايوا نصيب وغيروا المسار :: وعمى ابصارهم عنك انت واياه

معاك ربّ ما يخفاً عليه اسرار :: ومن قبل موسى هو اللي نجاه

وأيوب فيه الدود ياما دار :: وين ما صبر جاب الدوا وابراه

ومن بطن حوته في غريق ابحار :: هو اللي نقض يونس بعد ناجاه

وابراهيم في وسط لهلوبت نار :: وبرد وسلام يقول ما تاذاه

ولوط وين للقرية نوى الدمار :: بارياح النجا من بينهم وازاه

هو وعيلته وانقضه م الفجّار :: امفيت زوجته كانت من العصاه

......................... صلى عليك الله .........................

صلى عليك الله ربّ الكون :: والملائكة مليون في مليون

اعداد البشر من كل جنس ولون :: الحيين واللي فارقوا الحياه

واعداد ما ركز من طير فوق غصون :: وغرّد بعد خيّم اللي أمساه

واعداد ما غضب ربي علي فرعون :: وقوم لوط واهل الكفر والبغضاه

واعداد كل نقطه من بحر غليون :: واعداد كل كاين حي ساكن ماه

واعداد كنز في بطن الوطا مدفون :: واعداد ما بحث عالم علي سبّاه

واعداد ما تناقل من ارياح العون :: واداير وجا كاسي الغيم سماه

صلوا عليك صلاه مي من دون :: تليق بمقام اللي الله اصطفاه

اللي هو مقامك يا عمار الجون :: ياللي وين جيت الكون زال كداه

وهو قبل غارق بالفتن مشحون :: وما يفوت يوم وما تسيل ادماه

والسيف ياكل في الجوا مسنون :: وما يقعدن من غير طار نساه

جيتم وصدرك ع الحباب حنون :: هاديتم والهدي يا مبهاه

فيهم اللي بايع وهو ممنون :: وآمن بربّه وين هديك جاه

فيهم اللي مابوش يعترفون :: بهديك ولا باللي عظيم قضاه

اللي لكل شي ان قال كون يكون :: والملك ملكه من جميع ارجاه

لكن احنا غرن بنا البطون :: وابليس اللعين اللي الله خزاه

فينا اللي بالمادة مفتون :: يجري وما حاسب الموت وراه

فينا اللي م المال عنده شون :: ولا بيه يصدّق ولا زكّاه

فينا اللي خارج على القانون :: وخارج على الملّه وماكن داه

فينا اللي مظلوم م الواشون :: فينا اللي ظالم ينال جزاه

فينا اللي يعطف على القزّون :: فينا اللي ما يشغله بابكاه

فينا خبر واجد وفيه جنون :: واللي ما سمعنا بيه شاهدناه

وحق من قسم بالتين والزيتون :: اللي الوحي من عنده عليك هداه

انّ حالنا يشغل وبك مرهون :: نرجوا شفاعتك فينا نهار لقاه

......................... صلى عليك الله .........................

صلى عليك صلاة المحبين :: والملائكة لعند يوم الدين

وبينك وبين الله خيط متين :: واللي معاه الله ما ينساه

حماك م اليهود وم الصليبيين :: وم المشركين وقارنك باسماه

بكونك علي خلقاً عظيم وزين :: وحبيب ربنا واللي نواك نواه

وجدّ الاثنين الحسن والحسين :: خلفة "علي" طيب الله ثراه

اللي خذ التونيسه وقرة عين :: وماتوا وهم دينك علي مبداه

......................... صلى عليك الله .........................

صلى عليك وبالصلاة أمرنا :: انصلوا عليك كبيرنا وأصغرنا

ورانا احساب ان كانا قصّرنا :: وعصيناه صاحب الامر ما طعناه

هو اللي خلقنا وهو اللي صورنا :: وله نرجعوا نبقوا جوار احذاه

هاناك يسألنا علي ما درنا :: وهاناك من سلّف سلف يلقاه

وهاناك درب الخير كان اخترنا :: يبقى عندنا فيها اعروق نجاه

وان كان عكس ذلك هو اللي يسترنا :: ويسبل علينا ستر من يالاه

مع شفاعتك يا عزّنا وفخرنا :: يا عزّ من في الكون حبّيناه

......................... صلى عليك الله .........................

صلى عليك الله واحنا كنّا :: عليك ما انصلوا وانت قدوه لنا

وفي شفاعتك مامن اللي يستنى :: ورافع العين وما ايخيب رجاه

بكونك شفيع الخلق يوم الظنه :: يوم الرضيع يشيب فيد امّاه

يا من اصحابك بشّروا بالجنة :: كيف ما ابها بشرت باذن الله

عثمان وعلي وبوبكر فرض وسنة :: ما فرطوا في الدين حوذ قذاه

والفاروق من قالوا عليه تهنى :: وين ما حكم بالعدل في دنياه

والزبير في يوم الوغى يخشنا :: خيل العدا والسيف في يمناه

وبوالعوث فاز ونال ما يتمنى :: وين ما طلب حقق الله مسعاه

وطلحه وسعيد وسعد واخذ رنه :: تاريخهم يلمع اتقول امراه

عبيده بن الجراح ما نسينه :: واللي دار شي يخلّده ذكراه

وبوالعاص في نصرة الدين تعنّى :: وخالد خزام المشركين اعداه

وياما وياما من صحابي عنّا :: مهما حكيت يصعب ردود كفاه

كرامات من واحد بدون امنّه :: الخالق الباري واسع الميداه

هو اللي خلقنا وين نمشوا منّا :: منين كل حدّ تشهد عليه اعضاه

بلا شفاعتك يا من امليت محنّه :: يا قدوة اللي يفهموا معناه

......................... صلى عليك الله .........................

صلى عليك وبالصلاة حضاك :: أنت بشر لكن ع البشر علاّك

مسك الختام بقدرته اصطفاك :: والحكم حكمه والقرار خذاه

ولا يختشي من هذا لا هذاك :: سوى يقول لا ولا ايقول ايواه

ومعاك امهات المؤمنين نساك :: وبناتك وهذا حظ من والاه

وأصحابك اللي بيهم الله حماك :: وما خالفوا لك راي ولا اتجاه

عليهم صلاه وسلام واستبراك :: م اللي استوى ع العرش وين بناه

صلى عليك الله :: يا تاج راسي يا رسول الله :: والملائكة صلى عليك الله

للشاعر /جمعة بو خبينه الزوي