يارب ليبيا سلّم وسلّم هلها!!

من طرف **زهرة اللوتس** 2012-06-13, 11:01 am

للشاعر سعد العمروني ...
يارب ليبيا سلّم وسلّم هلها
قولوا آمين وآمنة تجْعلها!
ندعولها بأمان
قولوا آمين آمين يارحمان
احفظ ليبيا من نزعة الشيطان
رحمان ورحيم ورحمتك نزّلها
واجعل شعبها لاظلم لاعدوان
امازيغ وعرب والتبو فيك املها
ويسكت لسان الكذب والبهتان
ولبر الامان بلادنا وصّلها
وجميع من نواها بكيد من البلدان
في نحره ترد الكيد له عجّلها
احفظ مالها وقوي لها لركان
ولي أمرها للي اخيار عملها
قوي عقيدتها بقو ايمان
وبير الشريعة يكون هو منهلها
ولا لها غلو في الدين لانقصان
اجعل دينها في الوسط بيه اكفلها
ومتّع شعبها بالخير والبنيان
في سهولها في رملها وجبلها
وشبات ليبيا يارب والشبان
للخير دلّهم ودروبهم سهّلها
واللي مشى في درب للعصيان
اهديه الطريق وتوبته تقبلها
ومريضها اشفيه وشكوته عفران
للسيّة ونفسه م الذنوب اغسلها
وجميع من فقد يارب من حبان
بحبك عوّضه واخلف بخير بدلها
ثورة بديناها صلاة وآذان
وتكبير وجهاد وفيك متوسَّلها
تنال ليبيا يارب خير مكان
دنيا ودين ونعمتك كمَّلها
نسوان ليبيا ماكيفهن نسوان
ولاارجالها قولي هناك مثلها
ليبيا اسَّمت واسمها سبحان
تقراه ليبيا بالعكس ماتجهلها
هي حروفها نادت عليَّا كان
وباء وسطها ولي الضمير اولها
جبال وهضاب ورمل والوديان
سهول وبحر سبحان من شكّلها
ونعاود نقول يالله يامنان
عل الفتنة بلادي ليبيا تعزلها
واعداد ماخلق في لرض انس وجان
واعداد النجوم العالية منزلها
واعداد الحصى والرمل بالكثبان
واعداد قطر قطرات السما سيَّلها
واعداد مايكون وكان في لكوان
صلاتي وسلامي عل النبي نرسلها ....