يا العقل رزقك مو على مخلوق ,, على أللى بريحه فـ السحاب إيسوق

من طرف **العاشق الصغير** 2012-07-10, 2:20 am

يا العقل رزقك مو على مخلوق ,, على أللى بريحه فـ السحاب إيسوق

***

عليه أتكالك ,, ويقدر إيحقّق كلّ ما في بالك

مااتطول م الدنيا أمغير أعمالك ,, عليك بالقنَع راهو الطمع خزوق

أمعيشة الدنيا موش كي يحلاَلك ,, مرّات تمتلى مرّه أتجي لقلوق

***

ماعليه مكيده ,, عظيم شان يفعل كلّ شيّ إيريده

الاّ العبد قاصر مابصيره فيده ,, لاينزّلك لايرفعك لافوق

ولا له لقاط ولاوراه حصيده ,, وأنكانهو عطاك إيديرلك نقنوق

امّا تخدمه خدمة وصيف لسيده ,, والاّ تنحني وأتبات له محقوق

ماترتضي منهن ولا ويحيده ,, مفطوم ع العصَر عندك أحساس وذوق

***

لا اتـّلَكّه ,, حتى وأنت صارت في زمانك عَكّه

رزقك على اللي قوم لوط هَلَكّه ,, خلّي أمعاه حبلك دايماً معلوق

وها الكون حتى لو بخير أتفكّه ,, صيّوره مع طول الدهر مسحوق

يوماً إيدكّ الأرض دكّه دكّه ,, ويزول سترها والخافيات اتـّوق

ويطيح كلّ من راكب على حاركّه ,, الدنيا بعد عيشت دلال وزوق

واتـّمّ اتـّحاوس كلّها حابكّه ,, سكَاري عرَقها للوطاه أطروق

ماحدّ أفزاعه م الحساب اتفكّه ,, أمفيت بالعمل مافيه لا معتوق

***

رزقك على مولانا ,, ياالعقل روّق لاأتقلّ هنانا

الحيّ لو إيطير نهايته جبّانه ,, الدنيا وراه طريدها ملحوق

إيخشّ قبر يلمس فـ الضلع سيسانه ,, قبله خذا كمّين صيت شلوق

خلاّها اتردّح فـ السلَب جضرانه ,, قدّام بيت فـ النزله كما البرقوق

***

إيسوق سحابه ,, ويروي معالي الوطن بعد أجدابه

ويبقى عفاء متشابكات عشابه ,, دلال الغزيّل والخول والطّوق

قرقازه رقىَ لعند روس أصلابه ,, مع قصع جرّتها الناب أتفوق

وأتحق البلَط كيف المرَاه شرابه ,, أن جيته اتزهّي خاطرك ويروق

خذانه معاني الوطن هو وأصحابه ,, أسماح الفزَع وقتاً الطبل إينوق

م ن ق و ل

من طرف محمد اللافي 2012-07-10, 4:10 am

رزقك على مولانا ,, ياالعقل روّق لاأتقلّ هنانا

الحيّ لو إيطير نهايته جبّانه ,, الدنيا وراه طريدها ملحوق

إيخشّ قبر يلمس فـ الضلع سيسانه ,, قبله خذا كمّين صيت شلوق

خلاّها اتردّح فـ السلَب جضرانه ,, قدّام بيت فـ النزله كما البرقوق

من طرف **العاشق الصغير** 2012-07-11, 10:48 am

مشكــــــــــــــــ يابوللافي ــــــــــــــــور
علي المرور الطيب

يا العقل رزقك مو على مخلوق ,, على أللى بريحه فـ السحاب إيسوق

يا العقل رزقك مو على مخلوق ,, على أللى بريحه فـ السحاب إيسوق

رد: يا العقل رزقك مو على مخلوق ,, على أللى بريحه فـ السحاب إيسوق

رد: يا العقل رزقك مو على مخلوق ,, على أللى بريحه فـ السحاب إيسوق