خاطره : مهداه إلى الأخ/ فرج احميد

ضيف انجيهن .... اوهام قبل فيما فات كابر فيهن .... سبحانه اللي تميت .......................................
أنجيهن خاطر .... انعاود ادموعي ع الخدود قواطر ....ايحوس خاطري تخطر عليه مخاطر.... فاقد اوجوه اجواد مو لاقيهن ..... ما تقول متغدي وفيهن فاطر ...اولا اتقول متعشي اوبايت فيهن .... ليام شيلني مالهموم قناطر .... ايام الطرب عقلي اليوم انسيهن ........ ضيف انجبهن اوهام قبل فيما فات كنت انجيهن ...... سبحانه اللي تميت ....... ....

شكرا لك صحيت

بعد غيابهم جيت للـــــــدار وكبرن علي الفـــــجاوي
القيت بومها فوق لبـــــيار ايغرد غريد لمهـــــــاوي
والقيت الذرا ومكبر الــنار وعوين دار كـــــــــداوي
والقيت نضدهم كيف لا ثار اللي لتواريخ ثــــــــاوي
له زمان ما جوه زيــــــــار ولا نجع دايــــــر زداوي
بنايين لبيوت لكـــــــــــــبار دار كل جائع اجـــــــلاوي
وحاضرين في حرب لنصار ما ودروا من فجــــــاوي
وامحاربين في حرب لدوار علي خيل قدّر مقــــــاوي
ابوادي نوامس او تجـــــار ماهم اقصار الخـــــطاوي
ونا شرفت لجيت لانظار ما قابلــــــوا في جــــــــلاوي
نباهم ابقي غير تذكـــار يحكــــي عليهم الــــــــــراوي
مكاتيب هذا اللي صار ميمولــــــها للفنــــــــــــــــاوي
ياما مشن بي لفكــــار رديت والعقــــــل شــــــــــاوي
وادموعي عالخد قطار كما دمـــع قزون فــــــــــــاوي

 

جلسه مع لجواد فى سهرايه .......... هى منية الخاطر أحدود الغايا
جلسة ليلــــــــــــــــــــــــــه .......... تعيد ما مضى عدة أسنين طويله
فى جوها يشكى الخليل خليله .......... بنفس صافيه تلمع أتقول أمرايا
وفيهم اللى يحكى ونا نصغيله .......... ويرتاح وين ما يجبد أمعاى حكايه
وفيهم اللى يدوى بما طاريله .......... بطيب نفس ما يجحد أسرار خفايا
وفيهم اللى يلقى الحديث وسيله ......... عنها أيفرج فى أهموم قضايا
وترتاح الخواطر من أحمول ثقيله ......... راحة اللى لحمولها واطايا
متفاهمين نقضوا فى أوقات جميلة .......... ولا لغيرنا نجبد حديث وشايه

رائعه لكم الشكر