علي فاطمة طالق عنان أشعاري

علي فاطمة طالق عنان أشعاري *ولغير فاطمة مانقول شعر نشيت
ولفاطمة تطرب بنات افكاري *وبلا فاطمة ميت ان عمرك ريت
ومن فاطمة يانا علي ياناري *وفي فاطمة كل الامان إلقيت
وغلا فاطمة جوا وريدي ساري *وقدا فاطمة انشاالله انكون أغليت
لقسام فاطمة أمنده الله الباري *جمال فاطمة فتنة وفيه اغويت
حكت فاطمة بينا اوطان صحاري *يافاطمة بعد القلوب امفيت
انكان فاطمة هاوت انجيها ساري *لعيون فاطمة مامل السفر مليت
دار فاطمة شرقي أتجي عن داري * قول فاطمة ماتقولها لبيت
افشان فاطمة نخالف جميع اسباري * بطيف فاطمة ونا فالسجود اسهيت
فاطمة مجاديف الغلا والصاري * بسماء فاطمة نسكر سكير ابقيت
وعن فاطمة لا مايحيد مساري * وكيف فاطمة مازول قابل ريت
اوورا فاطمة طاشن بطيش انظاري* ومع فاطمة حلوة الحياة حسيت
وأرضى فاطمة انزعل عليه أكباري* وزعل فاطمة ماقبل بيه أبليت
وعيون فاطمة مرة أفاه غداري * ورموش فاطمة ان رمشت هذا ماكليت
وحجاج فاطمة خط القلم فيد قاري * إلا فاطمة من خالقة التنحيت
وخد فاطمة إللي البدر فيه ايماري * وأبسام فاطمة لون الحليب انسيت
وجبين فاطمة بارق أمزان بداري * وغثيث فاطمة انهزت ايجي تسليت
وجيد فاطمة جيد الخماس الضاري* وبياض فاطمة يعكس علي التبهيت
وجوف فاطمة يردح رديح أشواري * وعقل فاطمة يوزن أبلاد حكيت
وجسم فاطمة أسبط وهي بيطاري* ومشي فاطمة مشي الحمام عنيت
وأكساء فاطمة وارة إللي متواري * ونسب فاطمة مشهور قاب وصيت
اودي فاطمة طيبك عليك سهاري* واصدار فاطمة كذاب كان انجيت
طاري حسن لقطع وبلها طاري * لي فاطمة نطري الله دعيت
وحق من امصور فاطمة صواري * جميع ماحكيته اف فاطمة حقيت
مازدت من عندي امنقص داري* مش حقها فالوصف ماوفيت
مجنون فاطمة لاماأتقل اقداري * متفاخر بكوني فاطمة غاليت
جنب فاطمة كل البنات جواري * انكنهن أرمام اتكون جابر بيت
ماني اصغير في اتخاذ قراري * فاطمة قراري والكلام نهيت