ثلاث مربوطات بثلاث .. شعر شعبي

homeland كتب:هههههه رائــــــــــــعة جدا....
مشكور استاذ جمال المروج ....

جمال المروج كتب:قالك ثلاثة مربوطات بثلاثة
الشهامة مربوطة بالرجال ..الرجال قعدو والشهامة طارت
الحياء مربوط بالنساء... النساء قعدن والحياء طار
المطر مربوطة بالبركة...المطر قعدت والبركة طارت

قالو ثلاثة ماتاخذهن نين تنشد عليهن...وثلاثة مااتريح نين تفتك منهن... وثلاثة كان بطن(تاخرن) غابت طعمتهن
الثلاثة اللي ماتاخذهن نين تنشدن عليهن العسل واللبن والولية(المرأة)
والثلاثة اللي مااتريح نين تفتك منهن السوسة والدين والرفيق العطيب
والثلاثة الي كان بطن (تاخرن) غابت طعمتهم العزومة والتعزية وصلاة المغرب

ثلاثة يجيرك الله منهم ..وثلاثة راك اترافقهم ..وثلاثة راك تصننتلهم(تسمع منهم)..وثلاثة راك تصبح فيهم(تلاقيهم في

الصبح) ..وثلاثة راك تهلب(اوماتاخذش رايهم)
الثلاثة اللي يجيرك الله منهم ...ولد الحرام وقطاع الارحام ووكال رزق الايتام
والثلاثة اللي راك ترافقهم ... الهبل والعطيب وقليل المروءة
والثلاثة اللي راك تصنتلهم ...الفتان والكذاب وشاهد الزور
والثلاثة اللي راك تصبح فيهم ...الاشكل والمعيان وغضيب الوالدين
والثلاثة اللي راك تهلب رايهم...صلاي الاوقات وطعّام العيش ورضي الوالدين

قالو ستة خير من سته والستة مافيهنش خير
العافية بلا صلاة المرض خير منها والمرض مافيهش خير
المال بلا زكاة الفقر خير منه والفقر مافيهش خير
والقبيلة الظالمة الغربة خير منها والغربة مافيهاش خير
والزوجة النكدية العزوبية خير منها والعزوبية مافيهاش خير
والضنوة العطيبة العقر(العقم) خير منها والعقر مافيش خير
والجار القبيح الوحادية (الوحدة)خير منه والوحادية مافيهاش خير

توه فى واحد من الجماعه جالس قاله قالوا سبعه ماهن سته
وقال :
الكرهبه اللى تولع بالدف التشير خير منها والتشير ما فيش شى خير

منقول من الفيس بوك