رحيل المقرون

تقول القصيدة :
ما من أياماً زاهيت ورينا** وزالن أفواح العيد ما طقينا
يا من أيام في الجبل ريناهن ** يزهَّن البال ويطلقن لنظار
وما من أموالاً من الفريق ايمدِّن** يجنَّك كما سافي جراد وطار
لا لهن حكر ينجاب لا ينعدَّن ** زدواتك يجنَّك دايرات شرار
ويا ما هلبنا من ازراعه صابه ** وياما هلبنا من ابيار عمار
فِتْنَاهِن وشلنا بلخمام وهلنا ** وما نحسبوها غير شيلة دار
وثاني كدسنا في الشطوط حبسنا ** وتمَّت علينا ضاربه دوَّار
وردَّها بالسافي جبر بالسيَّافي ** وجاب عيت عبد وسيَّبوا العقار
وفاتوا أموِّل للبهايم باهي ** يسوق بضين تقول موج ابحار
ويا ما قنينا من بنات الغرَّه** اللِّي ع المناهل دايره دودار
ويا ما سيَّبوا لجواد من ذحذاح ** يجيك يتراكش فوق من المسمار
عريض اللبب وافي قينه ** مجدوب راكبه كيف من اسمع بندار
كلَّموا في ساعه ركبوا زعزاعه ** وتمُّوا يشيلوا وفوقهم نظار
كلايم يطجَّن في الرحيل يلزَّن ** ولا ع العواقل رادِّين اشوار
وين ما جملنا ع الغريب نزلنا ** بتنا حطيط تقـول نضد غمار
نوفتات عطانا قادِّين أوتانا ** شمَّرنا وما بيَّن الفجر شرار
برضنا شدَّينا في السوق ما رتخينا ** جينا لطلميثه عقاب نهار
بيوتنا بنَّينا وَنَزْلنا قادينا ** وما نحسبوها غير حدّ الدار
وثاني جملنا لبوترابه شلنا ** عطانا أيَّام هن راحة الدوَّار
وفزَّع كلايم دايرات ظلايم **  وشكَّت حذا الفرقان خطّ النار
ورحَّل الشاويَّه والبقر جمليَّه ** خذتن البنده طرد لزّ أحقار
وتقول ع السمينه عندهم اتشبلينه ** كلوها احذا هلها وهم حِظَّار
من ميلة زمانا سعينا طشَّانا ** تمَّ رمايم ع الطريق اسطار
ليله قليبه ليلة التضبيبه ** هاذيك ليلة النزله لبوجرَّار
فسدت العوامر وبات جملي سامر ** وما منلي حفت ع للمسمار
لمباكر سحبنا شور برقه طبنا ** ورانا كلايم دايرات ازوار
وين م لفينا للطيلمون وجينا ** لفوا مشايخنا جلِب سمسار
قعدنا انحيروا ننزلوا ونطيروا ** اجباحه عليهـن غايبات اميار
لمباكر مشينا جبر غصب علينا ** نزلنا ع المقرون دار عقار
خلانا ع الدقيله في حياة قليله ** وطقّ الشبردق من حذا لكتار
هذا عزاكم الصبر من مولاكم ** لا تعتبوا ع الوقت يا حضَّار
ورا الدنيا قديمه عندها تسقيمه ** إن رضيت عليك تقابلك بشكار
وثاني غشيمه عندها تبريمه ** تعاود عليك تقول يا ستَّار
اتباعد أصحابك من جميع اجنابك ** وتخلِّي عليك العامرات دمار
وخلين قبلنا اقصور عوالي ** غبين علاليهن وكل أثمار
ورادا علينا وهي تعكر فينا ** وبالكم أقرب ميجالنا وأوفينا
ما من أياماً في البرور نزلنا ** وما من طرب رينا بمال وهلنا
واليوم ع البراذع والحديد ادملنا ** باله وفاس وزابَّه في ايدينا
ما من أياماً زاهيت ورينا ** وزالن افواح العيد ما طقينا