مسابقة الامثال الشعبية *شارك تكسب*

تذكير بمساهمة فاتح الموضوع :

السلام عليكم ورحمة الله وبركاته

الاخوة اعضاء منتديات عيت ارفاد التميمي

ستبدأ مسابقة في الامثال الشعبية وسيكون هناك جوائز للفائزين الثلاثة الاوائل من قبل الادارة وانا اشكرالادارة الكريمة على دعمها وتشجيعها ومساعدتها لطرح هذه المسابقة

والغاية من هذه المسابقة هي بث التنافس بين الاعضاء

فكرة المسابقة هي ان اضع لكم مثل شعبي ناقص
وعلى كل عضو يرغب في المشاركة ان يكمل باقي المثل
وسوف اجمع النقاط للاعضاء نقطة لكل مثل
وسرعة حلكم للمثل الناقص هي التي سوف تحدد وقت وضع المثل الذي يليه

غدا سوف ابدأ في وضع اول مثل

وارجوا من الجميع التفاعل والمشاركة

واتمنى التوفيق للجميع

خيرها في غيرها ياجلنار

اجابة صحيحة يامحمد اللافي

نقطة لمحمد اللافي

خيرها في غيرها جلنار
ان شاء الله الجيات اكثر من الماشيات

المثل رقم(7)

طعامك ماجاني.........................

ودخانك عماني
مزبوط او لا يا دلع

جلنار كتب:ماطقيت في شي راهو عطونا فرصة بس

هههههههههههههههههههههههههههههههههه
حي لو طلعت الاجابه صح تكرهنا جلنار
المره الجايه ان شاء الله دزيها الها علي الخاص
راك تزعلي انبصر امعاك جلنار

اولا مشكوره علي مجهوداتك المميزه دلع
لكن عندي ملاحظه وياريت اتقبليها مني
ياريت ايكون في وقت محدد-- يعني ساعه معينه--لطرح الامثله الشعبيه حتى يتسنى لجميع الاعضاء المشاركه
**********************************
لك كل الاحترام والتقدير ومشكوره مره ثانيه دلع

دلع توا نعطيك رقمي ورني علي قبل ما تعطي المثل ماشي

هههههههههههههههههه

اجابتك صحيحة يامحمد اللافي

نقطة اخرى لمحمد اللافي(نقطتان لمحمد اللافي)

اشكر جميع الاعضاء اللي حضروا وشاركوا

وانا مش فايتة عليا اني انحدد توقيت معين لوضع المثل لكن انا حبيت ان اتكون هذه المسابقة حافز لجميع الاعضاء للتواجد المستمر في المنتدى

ولو اني حطيت وقت محدد للمسابقة فالكل بيتواجدوا في ذلك الوقت فقط وبيتغيبوا بعدها وهذا امر غير مرغوب فيه

يعني اللي اتهمه المسابقة ويبي ايشارك ويكسب لازم ايكثر من تواجده في المنتدى

وعموما بيش انسهل عليكم الامر دائما المثل ينكتب قبل الساعة 6مساء

يعني عليكم التواجد من الساعة 6 صباحا الى الساعة 6 مساء

لو تواجدتوا في هذه الفترة انا بنكون راضية تكفيني هالفترة للتواجد في المنتدى

ههههههههههههههههههههه

واتمنى التوفيق للجميع

واتمنى ان الكل ايكونوا راضيين

لكم مني كل الشكر والتقدير والاحترام

العنصريه هيا :

جلنار كتب:دلع توا نعطيك رقمي ورني علي قبل ما تعطي المثل ماشي

محمد اللافي كتب:العنصريه هيا :

جلنار كتب:دلع توا نعطيك رقمي ورني علي قبل ما تعطي المثل ماشي

كنك داك خشمك فى النص يامحمد اطلع منها ولا اسمعت فيها رقم تلفون هههههههه هابا عليك

بوفرقه كتب:

محمد اللافي كتب:العنصريه هيا :

جلنار كتب:دلع توا نعطيك رقمي ورني علي قبل ما تعطي المثل ماشي

كنك داك خشمك فى النص يامحمد اطلع منها ولا اسمعت فيها رقم تلفون هههههههه هابا عليك

موش عارف من الي ديما داك خشمه هههههههههههههههههههههههههه

مادرتيش حل معناها قعدنا من غير عمل ويبدا فينا الخصم من كثرة الغياب
هكي وموش متساتره
ديري حل يرضي الجميع يادلع

STAR كتب:معاك مرة اخرة اخى اسماعيل اظاهر ان محمد ودلع متفقين مع بعض

فكنا من الكبوات يا ستار

من الي ماطال شي عيب عليك يا ستار وانت امبجد فيها ربي يحفظك ان شاء الله

السلام عليكم ورحمة الله وبركاته

اسفة جدا على الانقطاع نظرا لظروفي الخاصة

وبنطلب من الاعضاء انهم ايوقفوا الكلام اللي مافيش ليه داعي داخل موضوع المسابقة

الاقتراحات مسموح بيها لكن الكلام الجانبي والتعليقات الرجاء الابتعاد عنها

احني في مسابقة جدية واللعب والمزح ليه اقسامه الخاصة

ان شاء الله بكرة نبدوا في مواصلة الامثلة

الشكر والتقدير للجميع

حاضر

ربي ايحضرلكم الخير ان شاء الله

انا ماني عصبية ياستار

هذا مجرد طلب عادي ههههههههههههههههه

مشكورين

اسفة على التأخير

المثل رقم (7)

العمى قال للعور......................قاله...................

العمى قال للعور......كنك................قاله.........ما كني شي..........
للاسف حتي لما طقيت فية ماعرفتش

ههههههههههه حلوة منك ياجلنار

خيرها في غيرها

ملاحظة:- رقم المثل (8) اسفة للغلط في الترقيم

هيا يااعضاء وين الحل

العمى قال للعور كاس العمى مر قاله نص الخبر عندي

اجابة صحيحة يامحمد اللافي

نقطة لمحمد اللافي(المجموع ثلاث نقاط لمحمد اللافي)

مشكوره اختي دلع
اهو عشان ما ايقولوش متفقين ما متفقين
خليتها نين ردت جلنار وجاوبت
ههههههههههههههههههههههههه

مايقدرش حد ايشكك فيا ياخوي محمد

انا عندي كل الاعضاء في نفس المرتبة

وعمري ماميزت عضو عن الثاني

كلهم واخواتي بنفس المكانة والاحترام

المهم

المثل رقم (9)

اللي ايدير روحه............. ايتحمل.................

اللـــى ايــديــر روحــه قنطــره ايتحمــل الــدوس.
و اخيـــرآآآآآآ.بــــــــــــــــــــــــــارك الله فيك...

اجابة صحيحة رونالدينو

نقطة لرونالدو

المثل رقم (10)

مايتم الخال ...................لين ............ولد اخته

مايتم الخال خال لين ايخاوي ولد اخته

لا ياكاكا اجابة غير صحيحة

خيرها في غيرها

مايتم الخال ...في خير................لين ..يكبر..........ولد اخته

او المثل فيه خطأ

عمرها امثال دلع ليبيا مايكون فيها خطأ يامحمد اللافي

ثقة وليس غرور هههههههههه

مايتم الخال في خير لين يكبرله ولد اخته

اجابة صحيحة يامحمد اللافي

المجموع(اربع نقاط لمحمد اللافي)

هيا يااعضاء وينكم وينك يابو فرقة