عقلها واجعها....مراد البرعصي

هذه قصيدة للشاعر المبدع والمتألق الشاعر الكبير مراد البرعصي
فيها إيقول:


عقلها واجعها .. على ما درينا ما خبر قنّعها

العين ع الغوالي

**

عقلها الحسوفه .. و جيهة كداه أمصدّره معروفه

تمنّيتني نبرم على كركوفه .. بعد حصادها نلقط أللي وقـّعها

حتى و ألوطا أمشلويَه مجروفه .. وأكبار رمثها يفجع كشيش ألفعها

ديما أنواسي فـ الجرف بأحروفه ..وأنروس الكبَد وأنزيد فيه وسَعها

ونبرم عليه بـ جابده مكلوفه .. تجبد فى الدّفين وحطبته تقلعها

غليظ المصابي جنش حوّ أكتوفه .. دارب على طولت أخطا مرجعها

ولد خويل مدراره عليه عطوفه .. هميله وهو هامل ثلاث أرضعها

وأدّبته على أوّل داب فيه عسوفه .. عليّا وعلى بو وروَره دلفعها

وتمّا سقيم أمغير صاحب نوفه .. مش كلّ تلزيمة مردّ قدعها

ولا أتصيرله من كلّ تابع خوفه .. ولا كلّ نزرَه ترعبه يسمعها

وأن سافرت فوق أمشظّيات أظلوفه .. ما من سرير وسمهتان قطَعها

وما من أجواف وكم خلاء بأدفوفه .. وما من أشهاق الموحشه مقبعها

وكم غرد رمل أمشوكلات أسيوفه .. إيجي إيحطّ سالم في أخيار أبقعها

ويبات حامد فى مضاف أضيوفه .. أن جوه قرعته, وأن جاء لناس أقرَعها

خطّرها مطيرة نبّتت نتوفه .. يا أنويرتي علّي أذهب تبّعها

وكبده عليها راقـّه ملهوفه .. كمّين رطعه بالبلاش رطَعها

فسَل العام ماقابل وشحّن كوفه ..وأللي أهناك بدّر بالدّفين زرعها

وقدّر ألله وجلّبت صيّوفه .. وأللي نبّتت جاء مقرص الياس رتعها

حايل وقدّر نين عاكل صوفه .. ولا عمر صارع للجّزيز صرَعها

ولا عمر راعيها صفَق بأكفوفه .. على عاقبه منّه الذيب رقـَعها

ولا عمر حضـّن من كزوز خروفه .. قزون أمّ ولجاوه الصيف فقعها

أتمدّ بعشيّة شمسها مطروفه .. أتحوش وين ماماضي النهار طلعها

عفا أمصيّفه مافيه لا خرشوفه .. لا قوس لا ظلف العجوز لسعها

ولا عمر عنزة سلّمت مكتوفه .. بذيله طواها والوَرَل يرضعها

ولا عمر قوده طوّعت مشنوفه .. صعيب دابها ما كلّ نود طبَعها

**

عقلها متضايق .. ونكذب عليك أنكان قتلك رايق

حتى والقمر لافوق زاهي تايق .. وظلمة الليل بـ نيسته قاشعها

الهجرس بلا شيره إيدير زعايق .. ويفلق سكون الليل لا وَعوَعها

والبيت بو زرَد ظنّك أبدون طرايق .. لفاوات لا بنّج إيسدّ تلَعها

وبلا تحجره ظنّك أتصير زنايق .. ويديرن عفَى من غير ماتمنعها

وتضمن أبيارك من أخلاف غلايق .. من عزقة الحيط ومن أطيور وقعها

وأللي مي وليفه ما أتروم خلايق .. سواء من وعَل والاّ أطيور بجَعها

وحتى الذلول أتـّعبك يا سايق .. تسهى أن طار ع الغفلَه الطير فجَعها

**

عقلها مليان .. وأن جيت للحقيقة خاطري زعلان

على قابيتها ماتنهر العطشان .. إيجوها عطَاش ويشربوا مشرعها

وهم أبيارهم بالحرَس والقفلان .. وسدّ البرابخ يبّسوا مصنعها

أتموت م العطش لو جيتـّم ظمآن .. أتحق المّـيّه وماأتذوق نشعها

على مانظرنا من غريب زمان .. ماعمر رينا هاالناس جشَعها

لا يعزموا لايطعموا جيعان .. ولايكرموا ضايف إلاّ بطمَعها

أتحلّق عليه إيبات عنده شان .. أن فيه مصلحه تنظر أكبار أقصَعها

ويبقى هزيز وبيطحَه بألسان .. السابق السابق تخجله بـ دشَعها

وبوعقل مايلقى أحذاه مكان .. الصادقه إيضيّع ذمّته إيضيّعها

ذوّابة السمن أتقولّي وأنكان .. أتذوق رغوته تسمط حنيط أصبعها

أنقولّك أتذوقه غير مو أجغمان .. السمن يقهم والقفار قطعها

أهناك ناس تاكل من أخلاف أدهان .. وأللي قدّموه أللي أهناك زبَعها

وأهناك ناس فـ الوقت العسير أتبان .. بلا أعياط وأتجدّي إيجيك فزَعها

وأهناك ناس ما تفزَع إلاّ لـ أفلان .. عنّه أتشيل الحمل بأتبورعها

ويشهد بزور وكلّ شي ينهان .. والغالية رخيصه تعلَـمه بايعها

قلاّب العلَل تلقاه والفتـّان .. قدّام المكاتب جبهته أمصقـّعها

أتحقـّه إيدُوُر أمغير بُـقّ وذان .. وأن تسقط الكلمه ع العرَب وزّعها

قصيدة رائعة مشكوراخى استار

الله يخليكم وينجيكم على هذا المرور الرائع يا بركة المنتدى اجعنا ما نفقدوكم

امنور ياستار وقصيدة جميلة لشاعر كبير