هناك ناس تكرهم من اول ليله ( سعيد شلبي )

من طرف **حبة مسك** 2010-07-15, 9:45 am

هناك ناس تكرهم من اول ليله وهناك ناس ما يهونوا سنين طويله
هناك ناس حبايب وهناك ناس تكرهم بغير سبايب
ولا عقل عامر كيف عقل الخايب ولا وجوه تندي كي وجوه بخيله
هناك ناس يا محلاهم وهناك ناس ما تقدر تعيش بلاهم
وهناك ناس حسديه وسود انياهم ثياب بيض من بره وجوه نيله
هناك ناس غوالي حتى ان باعدوا ما كيفهم لا والي
حمالين للسيه بطوعة بالي على خطهم ما عندهم تحويله
وهناك ناس عشرتهم خطا طوالي مكتوب في جباهييم خراب العيله
وهناك ناس تعزم واليدين خوالي وهناك ناس تبخل والجيوب ثقيله
هدايات م الرب الكريم العالي وبو طبع ما تنفع معاه الحيله
هناك ناس ما تقبلهم وهناك ناس لك غايه تجول لهلم
وهناك ناس لا داروا خطا تحملهم وهناك ناس في عقلك لهم تجفيله
وهناك ناس ع الحيين لا تجملهم اللي تجيك منهم مالها تبديله
ولا يفرقوا ظني الا بعملهم ما حد على التسعه وزد ليله
وهناك ناس ما ينسوا اللى صار لهم يردوه بعباره ووافي كيله
وهناك ناس لا هب الهبوب خبلهم ونسيوا اللي عدى وضاع جميله
ولا خير في اللي ما يبات عللهم ولا في الخليل ان كان فات خليله
هناك ناس يا مبهاهم وهناك ناس توعدهم وما تلقاهم
وان قابلتهم تلقى العذار معاهم مجهزينه ما عندهم تعطيله
كلامهم اللى قالوه ضد انياهم ان كانبحروا ينووا على التقبيله
احتار في مودتهم اللي ما شاهم مربيينه شاطب وحار دليله
لصحاب كيف في صف العدو تلقاهم صحبتهم معاك مغير نصب وحيله
قريب نقصهم منك بعيد وفاهم مشيول الدبر في حملهم تمييله
مفتوح ع الخساره بيعهم وشراهم الستره مع بو صاحبين قليله
هناك ناس اماره وهناك ناس ما ظني يساووا باره
وهناك ناس تلقى سعيهم في الكاره وارزاق واجده غير النفوس بخيله
والمال في قليل العزم راه خساره حتى وهو حكيم بعلم في تعديله
وهناك الفقير وما يسبب عاره حتى ان كان ما عنده ، اليد طويله
وان ما كان في جيبه قضي من جاره على قيس نيته ربنا يعطى له
مو كار الصقوره ما تجيه حباري ولا مرومه تلحق ثمن لاصيله
وحظك اللي ترميه م البذاره يطلع بعينه تحصده وتشيله
والجدي لو تقوي نين فات حكاره ان يبقى على شيل الحمول هزيله
وشوف الجمل حتى ان خف عباره صليبه على حمله اخرى ترمي له
شديد العصب حمال في مشواره قطاع الفيافي وين مد رحيله
ان راد ربنا ما حد يسيب كاره الراس راس، والواطي ان زال وذيله
هناك ناس يا مبسلهم لا غريب يقبلهم ولا من هلهم
هناك ناس في الحيين شين عملهم ذكر نخيل لا رميه ولا تظليله
علقم وحنظل وين ما تا كلهم وان رافقتهم يبقوا عليك عديله
وان نازلتهم جار لهلهم على عيب عيل يجردوا بالعيله
على جارهم ديما يزيد عللهم قلال العنا لا جت الدلو ثقيله