الخاطر جبد سيرة اطوال خجلها

الخاطر جبد سيرة اطوال خجلها***عليه وين ماتاقن منازل هلها
دارنا في طارق***واسيول لعليمه وين لاح البارق
والشجره والعفرج ابصره غارق***بشبوب نصر رامية الغذا ع جلها
ونجعك رحل ملموم مو متفارق*** لضلال وجفيرة فالخريف نزلها
دارنا والجيره*** وعشرة ربيع وصيف موش قصيرة
قدام لعليمة في اوهام عقيره*** وشرقي ابيار اشلبي هو منزلها
هاذين هن اوهام عز ومواكيره*** اللي سولته طالب الله ايسهلها
لا انروم لا نالف ابوالي غيره *** نين جثتي تمشي علي امحملها
دارنا وادياره*** متقابلات في فتح وقيد اجباره
وانريت نارنا فالليل تنظر ناره*** واتصادر لها بالعين وتقابلها
وفيها تخلط شولها وحشاره*** اودر اللي ماسميته كملها
عزايل اشهر مابينا شي ماره*** الا ما اشبير عالذراع فصلها
اعيون من علل الحوزه دما منقاره*** لاهانها لاخاطري بدلها
دارها القديمة*** غربي مزاته في اوهام كريمة
انزلت وين ماجاد السحاب ابغيمة*** نواجع ادانت في ربيع شملها
لسلس مع ربيان فاح نسيمه*** بعطور وين ماطل الفجور غسلها
اللحان لطرب دارت اطيور جهيمه*** وصاغت اللحان اسماح يامجملها
وشالت سلامي له امصبوغ ميمه*** اللي نار فالخاطر خفا شاعلها
ويوم لفطام وساعة التوسيمه*** كمين كبد تثغاي الجنين شغلها
وشايب الها قذار فالتجليمة*** صادت الخاطر حجتاً قايلها
نوارة اطراف الدير وامواهيمة *** تصعب علل الذانون مايوصلها
خطرها الاصاحب نوا تخطيمه *** بالي امنايه نشولا قايلها
بين الحبايب ماتفيد ذميمه*** بالباطله اللي مو ربنا جاعلها
مرات الضباب اتسيرله تضليمه*** ويتوه الخبير ورحلته يجلها
النشدة ايقولوا خير مالتغشيمه*** اصحاب العقول العامرة تاسلها
وامثال العرب فيها اقوال حكيمه*** كمين عين عاميها اللي كحلها
لاتغربك ضحكه ولاتسليمه*** ولاتخدعك لسنه بزيف عللها
خلطت ضنا لنذال قلت قيمة*** ومنازل الصقر البوم ماينزلها
عشبت الدار الهايفا الوخيمه*** ادودن عليها الهازله تاكلها
نوارة العفي راها طريدة ديمه*** ترحل وراها الناس وتشيللها
رحلان خاطري ياسمحت التبسيمه*** منازل ادريارك هن احدود املها
الخرمه دارك*** اخذي غايتك فيها فسيح مدارك
وراس التراب اسمه احدود عقارك*** نقب العبيدي في اقسام جبلبها
امشرق حجاج اربد ايبان اصدارك*** اللي حبيب رحلانهم امعاه صكلها
انجري امعاهن واردحى جرجارك*** بالزين والعصر يالي اقلال مثلها
اجدودك عليهن خايضين معارك*** وبحرب السدادي باديين اولها
ركابه علي قبجه وسنده حارك*** وتلحق عناق الريم وان جفلها
شيالت عنا مانقصو تذكارك*** ورا الناس ماتطرى الا بعملها
ونجو للمجالس تابعين اكبارك*** ومراح اللخول يرسم علي عقلها
انتي لير من صك الذهب معيارك*** ونعمه جليلة ربنا كملها
تصفايت اكحيل امنسبات اسرارك*** وجيدة الندر تظهر علي منسلها
انتي ماحلك عقلي صحيح اختارك*** لجواد من ضنو والزين في امخولها
هاذين هن اللي قون لهايب نارك*** ونقول فيك موقايل حسن في بلها
نلقاه خاطري طاوي عليه احصارك*** جنزانة حديد واثقات اقفلها
عندي الروح ماتزهي الابنوارك*** ونغبتي ظلام افرسان خيل فيه عزلها
يالي غلاك الروح فيها شارك*** وهي قبل راحت فالغريق نشلها
غناوة ارسلتي من بنات افكارك*** وصعبت عليه العقل كي حللها
القيك ع لمحبه ماضيه بقرارك*** بين الرجا والنقص مايقبلها
انكان الوفي كيلك اخذيه اعبارك*** ونكان نقص لا ترمي عليه سدلها
ايريح الله اسرارنا واسرارك*** ويبدل ارياق الحنضله بعسلها
ابجاه بقعتن في لرض فيها بارك*** رسوله محي منها اصنام جهلها
ادعي وشيليله الله انظارك*** تزهي عليه مي صاعبه انراد فعلها
عليه وين ماتاقن منازل هلها*** الخاطر جبد سيرة اطوال خجلها

مشكور يا حمدي تقبل مروري

احسنت نتظر منك الجديد

مشكور على هذة المشاركة الجد قيمة

منتهى التميز والابداع
شكرا لذائقتك

مشكور على المساهمة الرائعة