تطور مراحلنا العمرية ..

من 0 - 5 :

مميزاته

تقدر تعيط أمتى ما تبي وتاكل امتى ما تبي وتدره كبد أمك وباتك وعلى قلبهم زي العسل وكل ما زدت في العياط كل ما حصلت تدليل أكثر

عيوبه :

إنك للأسف معندكش جهد ذاتي لضرب ولد جيرانكم أو خوك اللي أكبر منك بشوية لو عسّل عليك





من 6 -10 :

مميزاته :

فرح الأهل بدخولك للمدرسة وهات يا تدليل ويا تديلع غير أقرى يا عمري بس وشن تبي إطلب

عيوبه :

بدء مرحلة أكل الجلادي من المدرسة ومحاولة الدخول في شلة للتأقلم معها بالنسبة للأولاد

أما للبنات فبدء مرحلة شد الشعر من البنات المشاكسات و كذلك مرحلة خليطة السندويشات والشكولاطة وتجي على راس

البنت اللي فطورها سمح





من 11- 15:

مميزاته:

تلافي جميع المطبات المستقبلية مع الاولاد في حالة التأقلم مع شلة المرحلة السابقة

لكن حي عليك لو ما صار منك شي شد ما جاك من كفوف وبونيات في الطابور وبرا الشارع ..

البنات : تطور عملية شد الشعر إلى تشريط القرمبولي والكراسات وأحيانا توصل العملية للتخبيش في الوجه





من 15-19:

مميزاته :

بالنسبة للشباب يقدر يسرق مفاتيح سيارة باته ويطلع بيها في مشاويره لما يقعد الاب مقيل أو يوم الجمعة في الصبح بدري

على اساس السبلة بيجيب خبزة

والبنات : الاكثار من التكبيد على اللون الاحمر والوردي وكل ما له علاقة بالورد والنجوم وصور الممثلين .. يعني احلام وردية

عيوبه :

سرعو تنرفيز الشباب وزيادة عملية تسكير البيبان بالقوة عند اول حمقة وسرعة اشتعال شعلة الغضب عند كلمة انت مازلت صغير

بالنسبة للبنات : على طول عند اول تهزيبة الدموع ارباع ارباع على قولة نبيل شعيل





من 20- 25:

زيادة مساحة الحرية عند الشباب مع سرعة التقلص عند البنات بسبب أن الاب مدلع البنات خلينا نحنا نحكموا فيهن

مع تنفيذ بعض الاحكام الجائرة كالوقوف في المشية المخطط لها لصديقة أو أي كان بعدم الرضى عنها أو بالتأفف من كثرة الخروج

وشن لزمتها المشية اصلا وعليش ماشية و,,,,و,,,, إلخ

والبنت كان بعد هالخطبة العصماء طلعت مرات تعدي تلقى صاحبتها مش قاعدة وتكمل القصة عندها بعدين

واذا كان لقتها يستناها خوها برا لعندما تشرب اول نقطة من فنجان القهوة ويرن عليها ويقوللها هيا وقت عليك

واذا كان ما صارش من المشية تمد وجهها ع التلفزيون وطبعا نرجعوا لأغنية نبيل شعيل "" والدموع ارباع ارباع ""





من 26 - 30:

بالنسبة للشباب زرادي وحفلات وزيارات في اي وقت وجو حلو بكل ويصبح مثل العملة النادرة لأهله يُسمع عنه ولكن لا يُرى

البنات سرعة الانتباه ودقة الملاحظة في تناسق الوان لبسة صحباتهن أو بنات تانيات المهم التناسق في لون الكندرة مع الشنطة مع الايشارب وإلخ

يعني حياة حلوة ووردية





من 31-35:

الرجال : الانتقال من مرحلة التنكيد على الاخت إلى مرحلة التنكيد على الزوجة والابناء وازدياد العزائم البطولية منهم

" مثلا والله اليوم ما متغدي إلا عندي "وطبعا القصة كلها تجي على راسها مسكينة

النساء : التوسع في دائرة تقييد الأحوال من الصديقات والعائلة إلى الجارات وآخر ما توصلن إليه من أنواع غريبة وعجيبة من الموالح

والحلويات والابتكارات الخرندعية في اللمات

حتى يقال عن كل واحدة أنها دارت لمة ما دارتها وحدة ..





من 36-40:

مرحلة النشاط على مختلف الاصعدة للطرفين ..





من 41 - 45:

مرحلة تضييق مرحلى تقييد الاحوال لنطاق العائلة ومراقبة الاولاد وتصرفاتهم وتسميم بدنهم بكل الكلام الجميل في حالة الوقوع في خطأ

والتفاخر بأنهم لم يكونوا هكذا في مرحلة طفولتهم .. جيل مش عارف منين طالع

" تغرب واكذب طبعاً "





من 46 - 50:

مرحلة هدوء نسبي للطرفين .. يمكن أن تكون مرحلة شحذ الهمم أو فترة استراحة المحارب





من 51 _ 55:

مرحلة التكريس في المرابيع وعدم الخروج الا للضرورة القصوى والطياح على قنوات الجزيرة الرياضية والشاهي والدخان

مع فترة ازدهار ونشاط لدى النساء في الخروج للمحلات واللمات المهم متقضيش يومها كله في الحوش

واذا كان ربي عطانا وعطاكم عمر باقي السنوات يا أما في دار العجزة يا أما في وحدة من التراكين وتقييد أحوال العيلة والتعقيب والتعليق على كل حاجة تصير
وما يعجب العجب
منقــــــــــــــــــــــــــــــــــــــول