الدنيا عجيبه والغريب تجيبه , روفة الدعبوب

من طرف **عبدالحفيظ عوض ربيع** 2010-10-27, 7:56 pm

الدنيا عجيبه والغريب تجيبه , روفة الدعبوب
الدنيا عجيبه والغريب تجيبه
واللى فالقضا ربك عليم ابغيبه

الدنيا مره
تزوق اوللى جاهلين مضره

المؤمن المخلص فاضلال اتجره
وهو كان في درب الهداه ايصيبه

والعاصى تعوذ من ابليس وشره
وتاب ع المعاصى بعد دق صليبه

الدنيا حوزه
تاخذ ابفير م تجيب فيدك كوزه

واللى فالرخى فرطت فيه اتعوزه
اوان عازتك ماعد الجيب ايجيبه

ساعات تلبس ولبستك مطروزه
وساعات من ثوبك عليك الريبه

الدنيا صابه
والناس ع لمعيشه كلها تزابه

واحد أيلمه زرعها بترابه
واحد ايهاب الحصد والتشويبه

ونقال زرع واطى مايرد اتعابه
ويوم ميرته تصبح عليه صعيبه

الدنيا سوقه
ساعه ابشدتا وساعه روقه

واللى الها مطمان جاته بوقه
شاف شى موحاسب ولا يدريبه

خلاته أيخمم ضايقات اخلوقه
وراسه تبدل ع السواد ابشيبه

الدنيا عوجه
اتجيب للغنى فقره وللفقير الخوجه

كيف البحر ينزل ويرقى موجه
ريته مثيل الوقت في تقليبه

واللى زرع غيره جنا منتوجه
واللى افرح بالدين جاه طليبه

الدنيا عجيبه والغريب اتجيبه
واللى فالقضاء ربك عليم ابغيبه

القصيدة للشاعر المرحوم...روفة الدعبوب