تبو تعرفو عليش الحب عمي ..؟؟؟

من طرف رؤوف عوض الجبالي 2010-12-16, 3:28 pm

مش ديمه يقولو الحب عمى

ومجنون وجو هضــآ

اكـــيد مفش حد عمره فكر وحاول يفكر عليش صح

المهم......

فتح دماغك معايا واشرب اميه بس عقب فيها شويه
واقفل النقال واسلح سباطك قدام المنتدى

وهيا نبدوو ::

يا سيدك ابن سيد
زمانات بيكل

ايام الارض مكنش فيها بشر
سفرتح فاضيه بيكل ويووو

كانن الحاجات السمحه والحاجات الشينه
يدهورن في الارض

ومكسدات بكل وماعندهن مايديرن
ضاربهن الطل

ودارو حل للمشكله هذي

قررو انهم يلعبوو - وابيس -

كلهم وافقو وعجبتهم الفكره خير من الكساد والملل

وصبا الجنون قال
انا اول واحد اندور عليكم

وانتو اكرسوو

الباقي قالو تم

وقاللهم انا نبدا في العد انتو اكرسو
وجا عل الشجره ووبدا يعد

وبدت الحاجات السمحه والشينه يكرسوو

- الرقه -
مشت وكرست فوق القمر

- الخيانه -
كرست جنب الكناسه والعفن

- الولع -
كرس في الغيوم

- الشوق -
دفن رووحه تحت الوطى

- الكذب -
في حيطه قاعده تحت في البحيره كرس تحتها

- الحسد -
كرس في الكهف

وعمكم الحب كالعاده ماعندش قرار
فلذلك ماعرفش وين يكرس

والجنون قريب يكمل العد

الحب قعد حايس
وكرس في شجره الورد

الجنون كمل العد

الرقه طلعت من فوق القمر
والكذب من البحيره ونفسه قريب ينقطع

ولقاهم كلهم ما عدى الحب

وجا عمكم السوسه اللي اسماه الحسد

وجا عند وذن الجنون وقاله .. راه الحب كرس في شجره الورد

وطبعا الجنون شن يبي يقعد اكيد هبل ومجنون
خذا طرف لوحه مسنيه
وقعد يتغز في شجره الورد
في كل تركينه

لعند ما سمعو صوت بكاء
وطلع الحب وحاط يديه على عيونه

والدم ينقط منهن

والجنون قاال حي علي شن درت

والحب رد عليه
قاله خلاص عيوني راحن فيها معش انحق

الجنون قال .. همك مبكي وشن انديرلك وحقك عليا

الحب :: قاله مانبي منك شي غير انك اتكون جنبي وتوريني الطريق لما نمشي

والزبده والخلاصه

يعني الحب عمى واللي يقود فيه الجنون

وهضا حد السوو,,, وسلامتكم

مما راقى لي