غـــنـــاوي وشـــتـــاوي( الــخـــيــانــة )

غـــنـــاوي وشـــتـــاوي

عـلـى

( الــخـــيــانــة )
نبكي موش غلا في اعيونه .. وجعتني ياناس الخونه
ادعايا يا خوان عليك .. انت تشحت وانا نعطيك

جعنك يا خوّان الصوب .. انشوفك في الشارع مكلوب
قراية مع كثرة الأحزان .. الغالي خان .. الثلاتة اجتمعن في امتحان

اوجعنك ياخاين العين ... كيف ضحايا فلسطين
صوبك ع الشينات امبيت ياخوان انعدك ميت

خوّانين الله يلعنهم .. انجيبوا غير اللي يقهرهم
ان خان العشرة مايلتام .. عرب خانت حتى صدام

ياخوان غلاي اجعنك .. تشكي كيف مانشكي منك
خان عزيز انديروا غيره .. ماتصرا للعين بصيره
مانحسابه تصير معايا .. خونه من الناس الصلاّيا
****
بكانى الجديد اليوم ينشد عليش خانونى القدم
اللي خانك يا عين انسيه ...جريمه كانك عاديتيه
ليش الخونه ياغيابي .. قبل القلب عليكم عابي
اجعنك ياخوّان الحب .. مريض واحل فيك الطّب
اجعنك ياخوان الصوب .. ضحية كي طارق أيوب
انت يا عين عزيزك خانك .. دار خطا شمت عدوانك

وين عزيز اغلى عالخاطر .. خان وخلى دمعى قاطر
يا دنيا ليش اتخونينى .. جيتى بين عزيز وبينى

يوم غلاهم ما شاورتى .. خانو يا عين تكدرتى

خوانين عزا مافيهم وانتي يا عيني تبيهم
صاحب صوب نويت انخونه حقيت الخونه في عيونه
‏ عيني حساسه حستهم قبل ايخونها خانتهم
خان عزيز الله لا يرده ميت تحت الحيط انعده