هالب وراي قديم - صلاح الغزالي

من طرف **عبدالحفيظ عوض ربيع** 2009-06-09, 9:06 pm

هالب وراي قديم

هالب وراي قديم جيتك رامي
بالك اتداوي يا جديد اللامي

داوي دايا
وخلك اقريب يا جديد احذايا
واسعى علي نسوة قديم امعايا
وخليني علي حنك انحل اصيامي
وداوي اجروح امغيبات هنايا
كمين صرخة في صميمي كامي
وكان ريتني مستوه راه تهايا
اللي وين ما يخطر اتضيق علامي

جيتك رامي

جيت ابجرحي
جيت من قديم اليوم ناسي فرحي
جيتك امرافق حزن ديما طرحي
جيت من صحاري يا منايا ضامي
قصة عذاب ايطول فيها شرحي
كابوس تمت حاضرة افمنامي

جيتك رامي

جيت ابطوعي
جيت من قديم انهر ناصب نوعي
اسيول عاليسار وعاليمين ادموعي
جيتك امدقدق ياعيون الدامي
جيتك ابحربة غارسة في اضلوعي
نا دخيلتك افزع اوعد ملامي
نسيني اللي فيهم فشل مشروعي
في دنيتك ناوي ايكون مقامي
خلك حنون امعاي هدي روعي
عطيني وفاك وخوذ كل غرامي

جيتك رامي

جيت ابعبرة
وجيتك ابجرح قديم مابا يبره
وجيتك ابخاطر ضاق نافذ صبره
وجيتك ابلطة يا جديد اقسامي
تقنيد المفاصل شين موعر جبره
ونا مفاصلي قند ورق عزامي
جيتك ابقصة يا جديدي غبرة
اليوم حايلة بيني وبين منامي
ويقولوا السلك ان طال راحت لبرة
ما عاد ينفع عالقديم كلامي
مدعى قديم اليوم حافر قبره
انريد انتلذذ في عقاب ايامي