احنا هل الخرمه ومانا للخفى / روفه الدعبوب

احنا هل الخرمه ومانا للخفى .....وعايشين فيها من اسنين ابعاد
اشداد عزم صبارين ع الظيم والجفا .... لا نرحلو للريف لا لتشاد
احنا اصحاب مبادى ........ واحنا جدنا خايض حروب سدادى
ومامن اللى جانا ورد ايدادى ....... ومامن اصفوف بكيدنا تنكاد
ومامن نجوعا دايرات سدادى ...... فوق مالغرابى سعيهن وراد
ارتاحا بعد قتلت الصيد العادى ...... ونسين انه ذيب القطر ولاد
وغربلهن قزون نجع سعادى ........ وعدن دقيله كى عليهن عاد
اوجبن مع راس الحجاج قنادى..شايلات لضهاد رقياته بطرحادراتة اعناد
احنا هل الخرمه دارنا وموكرنا ... وفى حوزها مامن اهموم نظرنا
وشال كيدنا خونا اللى صادرنا ...... وعانا وعانينا اسنين اشداد
ومامن امعنا بينا ودرنا ........ اللى فجوته تصعب علل السداد
لاطوع طعناله ولا انكسرنا ........ وبرين اجروحتنا بلا ضماد
ولا كمدونا ولا عليهم سرنا ......... ولا بينا باتن حراش اكباد
وجبنا مناقضها بها بصرنا..... والسمح هو عثر لجود في الجواد
احنا اصحاب الليقه ........... واحنا اصحاب الواثقه الحقيقه
لا يشطنا ظيم الزمان وضيقه ..... ولا نرحلوا لا نهلبو لبلاد
سبعين الف ساقونا ال رمل ابريقه... ومنها خرجنا وثلثنا اللى عاد
وان المسى والصبح مجمع ريقه... وجلود النساء طابن من الجلاد
ونجع العقيله فيه ذاب فريقه..... علثر المشانق لادواء لازاد
حفرنا بيوت الفار وفواريقه.... ومخازن النمل لجوعنا طراد
اوفايت ثلاث اسنين سد طريقه.... الظالم اللى فينا خذا ملهاد
لاحبنا لاحط فينا ثيقه.......... ولا بودنا لا بظلمنا استفاد
وعشنا وفتنا فالحياة وثيقه....... وفيها انسينا كاتب الجهاد
احنا هل الخرمه ومانا للخفى.... وعايشين فيها من اسنين ابعاد
اشداد عزم صبارين ع الظليم والجفا.. لا نرحلو للريف لا لتشاد

نحن أعيال ارفاد مرفوع النبا اسماح المجالس في وسيع الجال
وها العيلن عزام ع الضيف أنلفا كي احضورنا كي غيبت العقال
ايبات منبسط مالزاد والفرش والكسا في بوطنب ما فيه فك أخلال
وحنا بنتنا حد العفافا والحيا في نجع هلها والمعاش دلال
أنجت ترتشك من بيت لا بيت ماشيا ريم اريلي ما الدنو مو جفال
واحنا نكسبو فالقوت وافيت الذراء اكسار الجنايب عزوة البهال
دياره علل ملتاث ساعات البلا اوسالو كريمه طبلها كي قال
لولاك يا يادم الكاسح ما مشا حتى والعمار امسجله باجال
عليهم حدر حدرت اذويبن مع لغذا واللي دنا منه اسقاه اودال

الاخ خالد
مشكور على المشاركة ولكن من صاحب هذه الأبيات؟
ولك تحياتى

مشكور اخي عبدالعاطي
علي نقل هذا القصيده الرائعه
تقبل مروري السريع علي صفحتك
تحياتي لك:
المهندس

اخي عزالدين عبدالجليل كيف حالك وحال الأبناء وأتمنى من الله أن تكون بصحة جيدة
القصيدة للأخ فرج بوطيب
وأنا سمعتها من أحد أبنائه

الاخ خالد
بعد التحية
مشكور على المشاركة أما الابناء فهم بخير والحمد لله
ولك تحياتى وسلامى

مشكور علي القصيدة الرائعة وارجو المزيد من قصائد الشاعر روفة الدعبوب

مشكور اخى على المشاركه القيمه

مشكور على ما طرحت بارك الله فيك

مشكور على ما طرحت بارك الله فيك

منورين على مجهوداتكم وهذا المنتدى يعتبر مرجع وديوان لنا ولاحفادنا , ومزيد من التقدم والرقى . اخوكم على الدوام