وايش خير لروعي الفاخري

ويش خير من ود تصدق اشواقه ..
ومجلس رواقه ..
وجوب الخلا مع خيار الرفاقة

ويش خير من كل لحظة سعيدة ..
وطفرة جديدة ..
وخطوة رشيدة ..
بعين لاورا وعين شور البعيدة ..
وخطفة سويعات داهن تحيده ..
لكبود الزهاقة ..
وايطرشق زواقه

ويش خير من لم شمل الغوالي ..
ولعب وتسالي ..
وصفو الليالي ..
يتالن توالي ..
علي عقول م الهم باتن خوالي ..
مباسيط في هيف دنيا توالي ..
منام الرواقة ..
وتصدق اصداقه ..
وتزيد اطرشاقه ..
بضحكة علي وسع فمها لحاقة

ويش خير من شق صحراء خشينة ..
بكروزل متينة ..
علي قلب زينة
امسكت حنينه ..
مفيت مروحه تنوح نوح الحزينة ..
عليه وينما جر الخضار عينه ..
اللي برتشاقه ..
علي رق ساقه ..
وخف انطلاقه ..
جاباته وما طال يزمط ارياقه

ويش خير من شيل دامي اضفاره ..
غريم الحبارة ..
منين ما تمارى
وصرد انظاره ..
ونطح في القزاز هم همة اطياره ..
دوار في السما كظم ادباره ..
وطوح ازقاقه ..
وفاج بمراقه ..
ولحقه ساقه ..
بكفه وجا ماسكه من خناقه

ويش خير من بوخ شاهي الكمرة ..
بخفات جمرة ..
مع طول سمرة
علي ضي قمرة ..
نجومها مدابيب ببيضا وحمرا ..
علي روض طش الندا فيه همرا ..
نوارة عراقة ..
تغامض اوراقه
لا نسم ختاقه ..
شطيط النفس ينتفض من فواقه

ويش خير من خبط غيم المداري ..
عشرية الصحاري ..
بشبوب ماه جاري ..
سفا مع الحداري ..
وثور تراب البلط والقعاري ..
وعدا يوش فوق حيط وشفاري ..
وجبل من شهاقه ..
نزل في ضياقة
ع المالح دفاقه ..
تقرع تراب حمر بدل مذاقه

ويش خير من هيف الجبل في الشعايل ..
علي نبع سايل ..
شرابه زلايل ..
ومد الظلايل ..
منين برمن شاحاطات القوايل ..
اصدار في نفس موج داير هلايل ..
وراقه براقه ..
خفيف اصطفاقه ..
منين يتلاقي ..
بياضه ايجي منخضر في زراقه

ويش خير من سرج جالط معنه ..
تقول اخطفنه ..
بجدل المتنا ..
يتل فيه جنة ..
تريد الارض تنحل من تحت منه ..
بنسورته نقيش الحصي دار زنة ..
يا دوب ايتواقه ..
من جوع انعزاقه ..
ع الارض بحماقة ..
متجوشن ايطير الزبد من اشداقه

ويش خير م الحقوقلة والشهاة ..
وصدق العبادة ..
ودرب الجوادة ..
وقو الارادة ..
وانطاح العدو معتدي من ابلاده ..
وسعوة مي نصر تبقي شهادة ..
للروح انعتاقه ..
من هول الملاقة ..
الا ها الطواقة ..
مصيرها الكل رايحة في براقة

مشكور العاشق

مشكوره يامي

مشكــــــــــــــــــــــوره يازهرتنا