يوميات الحاج بلقاسم:هنا ليبيا اف ام ، إليكم نشرة الآخبار

من طرف **زهرة اللوتس** 2012-01-12, 9:36 am

هنا ليبيا اف ام ، إليكم نشرة الآخبار
( دعا ديوان المحاسبة كلَ الجهاتِ الخاضعةِ لرقابته والممولة من الميزانية العامة إلى ضرورة إلتزامها بالتعاون مع أعضاء الديوان وموافاتِهم بأي بياناتٍ تُطلب منهم، واعتبرَ كلَ من أخفى بياناتٍ عن مباشرةِ مهامِه وأمتنعَ عن تقديمِها لعضو الديوان مخالفِاً وسيُعاقبُ تأديبياً) .
الحاج بلقاسم: بالله يا خوي هذه التعميمات من ديوان المحاسبة كان ايعمم فيها جهاز الرقابة على القطاعات لكن تصتدم بعمك افلان وبعدين من هم الموطفين التابعين للديوان الذين يقومون بالتطبيق موظف محتاج لكذا مقابل يسكت على كذا.....وان شاء الله الكلام ايصير منه
قاسم: اسكت يا حاج راهو يسمعك حد من اللجان المجلسية أو من من مكتب الاتصال باللجان بالكتائب الثورية ممكن تنطب وتريح فيها يا حاج فكنا تربح...
الحاج بلقاسم: ياريت ننطبو ا على الاقل مانشو فوا شي ومانشاركو في شي!!!!
قاسم: وبعدين تقعد سنين تراجي في اصبح الصبح متع 17 فبراير واشبح آمته بيجي ممكن سنة 2088 وربي ايطول في عمركّ!!!!
الحاج بلقاسم: آآآآه كانه الواحد تكلم ايقولوا عليه طابور خامس وواحد من أزلام القذافي وعضو فاعل في اللجان الثورية ومرات يطلع حتى مرتزق بعشرة ألاف دولار في اليوم، ولو سكت بيتبلغم !!
قاسم: شوف يا حاج مادام فيه مجاملات وتعظيم لشخصيات هي اساسا المفترض تكون في خدمتنا الموضوع مازال زي ما هوا لا 17 ولا 34، شوف العجب !!! بداية الاسبوع وزير التعليم زار افضل واجمل مدرستين في شمال افريقيا،،مدرسة التقدم ومدرسة السلام، بالله وزير التعليم ايزور اجمل وانظف علاش هالمدرستين بالذات!! الوزير ايفتش على افضل المدراس وما شافش الاطفال اللي قاعدين في الصقع مش لاقيين كراسي في المدراس الثانية وتقولي لجان تفتيش !!! خراف زايد يا حاج زور اجل مكان، والسلام باليد وحراسات وتأمين حراسات وبارجات حربية تراقب وطيران من فوق كله لان خادم الليبيين في قطاع التعليم زار مدرسة!!!
الحاج بلقاسم : امالا علاش 17 فبراير ما دامه الحال زي قبل زي توا، تي انحي نبو 117 فبراير وحتى مارس وأبريل باش انظفوا البلاد من الفساد والسوس.
قاسم: ربي يستر يا حاج ، اضني اني في حلم يا حاج ، اهبدني على راسي باش انفيق يا حاج!!! راك اديرها حق يا حاج بلقاسم
اني مش ناقص هبد ع الراس والمفاصل. ولجان تفتيش وتطهير وغسيل وتجفيف!!!
الحاج بلقاسم : أيييه اسمع امالا ياخوي !!! قصة زيارة وزير التعليم لمدرسة التقدم كاحسن مدرسة مش اول مرة،،، تصور ان هذة المدرسة زمان كان امدايرينها وجه قبول عندما ايجى حد من اليونيسكو والمنظمات اللى ايهمها التعليم!! لكن الوزير مفروض ايزور المدارس اللى مقعمزين على الزليز واللى مافيهاش حمام ...اذا قاعدين فى دار امس.. وانت مبحبح برا من البلاد واحنا انعانوا فى الغصايص وكل يوم نسمعوا فى الكلام اللى لايسمن ولايغنى من جوع
قاسم: امبمح يا حاج هييييييه، هي الغربة يا حاج مش غصة وإلا كيف،؟ قالك شني اللي صبرك على المر قاله اللي امر منه.....
الحاج بلقاسم : سامحنى الضى قريب يهرب وانا خوك غدوه ماشى للأردن رافع الحاجة بنديرلها روبيساته على احسابي لان اللجان الطبية إلغوها ،،، غر شن درنالهم يا حبيبتي...