الى كل حرائر ليبيا ..!!

من طرف **زهرة اللوتس** 2012-01-24, 7:06 am

الى كل حرائر ليبيا ^_^
.............................
... تستاهلي ديوان موش قصيدة
وتستاهلي قلادة ذهب وحديدة
تستاهلي التمجيد
... وتستاهلي الاشعار والناشيد
وتستاهلي لبس الذهب في ليد
وتستاهلي اللبسة اتكون جديدة
ودونك سرايا مجحفلة وحديد
ودونك صقورة في الحياة زهيدة
ولو يكملوا صنديد في صنديد
ما يوصلك سافل بمدة ايده
وقداش دونك ماندفن شهيد
هانو عليك الروح يا فريده تستاهلي ديوان موش قصيدة
وتستاهلي قلادة ذهب وحديدة
تستاهلي المحافل
وتستاهلي دونك تكون جحافل
ودونك نموتوا في الحروب قوافل
لاجل تعيشي في الحياه سعيدة
وموحال يدنى يوم منك سافل
ولا من يطولك يا شرفنا بيده
انتي صيفتك صيفة الريم الجافل
ديما على لنظار دوم بعيدة
قداش دونك طاح فارس حافل
بالنصر والتكبير والتشهيدة
وقداش غازي راح ريحت غافل
خسر في معارك ياسرة وعديدة
تستاهلي ديوان موش قصيدة
وتستاهلي قلادة ذهب وحديدة
تستاهلي فزعتنا
وتستاهلي ميعادنا ولمتنا
ولو كان في سباك جملة متنا
ماهو خسارة فيك يا المجيدة
يا سر فزعتنا عما قوتنا
يا سمحة الصيفات والتهميدة
نفدوك ياحرة وما همتنا
سيلت دمانا عالتراب بديدة
تستاهلي ديوان موش قصيدة
وتستاهلي قلادة ذهب وحديدة
تستاهلي حنية
يلي على شانك الموت شوية
يطيحوا تريس افداك ياليبية
يا شامخة فوق الجبال فريده
وديما عزيزة نفس دوم قوية
وديما عماها حق دوم عنيدة
وماعاد غير الروح فيه هدية
تستاهليها يا حزام الجيدة تستاهلي ديوان موش قصيدة
وتستاهلي قلادة ذهب وحديدة
نفدوك يا العفيفة
يللي خديتي من جبلنا صيفة
كيف النسوم البارده في صيفه
وكيف الدفى ع النار يوم جميده
يللي عليك القلب رفرف طيفه
بالود يا حرة تكوني ريده
يا سعد من كنتي غلاه وكيفه
وكنتي عشيرة عمر يا الوديدة
د . مسعود صوة الزنتاني
رد عليه الشاعر:علي بورقيقة الزنتاني
وقال:
تستاهلي المحافل***وتستاهلي دونك تكون جحافل
ودونك نموتوا في الحروب قوافل***لاجل تعيشي في الحياه سعيدة
موحال يدنى يوم منك سافل***ولا من يطولك يا شرفنا بيده
انتي صيفتك صيفة الريم الجافل***ديما على لنظار دوم بعيدة
قداش دونك طاح فارس حافل***بالنصر والتكبير والتشهيدة
وقداش غازي راح ريحت غافل***خسر في معارك ياسرة وعديدة
تستاهلي فزعتنا***وتستاهلي ميعادنا ولمتنا
ولو كان في سباك جملة متنا***ماهو خسارة فيك يا المجيدة
يا سر فزعتنا عما قوتنا***يا سمحة الصيفات والتهميدة
نفدوك ياحرة وما همتنا***سيلت دمانا عالتراب بديدة
تستاهلي حنية***يلي على شانك الموت شوية
يطيحوا تريس افدا الزنتانية***وهي شامخة فوق الجبال فريده
وديما عزيزة نفس دوم قوية***وديما عماها حق دوم عنيدة
وماعاد غير الروح فيه هدية***تستاهليها يا حزام الجيدة
نفدوك يا العفيفة***يللي خديتي من جبلنا صيفة
كيف النسوم البارده في صيفه***وكيف الدفى ع النار يوم جميده
يللي عليك القلب رفرف طيفه***بالود يا حرة تكوني ريده
يا سعد من كنتي غلاه وكيفه***وكنتي عشيرة عمر يا الوديدة
وتستاهلي