أحلي شعر لأحلى مدينة (بنغازي)

من طرف فداليبيا 2012-03-13, 5:07 pm

احلي شعر علي حبيبتي

احلي شعر علي حبيبتي

بنغازي بداية الامر @ يوم خمسطاش اثنين كيف الجمر

شباب في ربيع العمر هان العمر @ بشاير الثورة في سماها لاحت

.. يسقط نضام الطاغية بالامر @ كل الحناجر صوت واحد صاحت
... ويوم سبعطاش اسيول تشمر شمر@ الطاغي وضناه وزمرته استباحت
بنغازي خذتها ليبيا بالغمر @ الله يربحك بيدك الغمة زاحت

بنغازي النسوم الشافي @ بنغازي اشبوب ركاح ركح سافي
بنغازي عطاتا درس ماهو خافي @ دون ليبيا لصقورها كي حاحت
كابوس كانت دوم للقذافي @ لاريحاتا يوم لااستراحت
انتصرت وتمت هي الحضن الدافي @ الكمين عيلة فالفيافي ذاحت
حنونة ودودة بالجفا ماتكافي @ ومن حنها عالوطن ياما ناحت

بنغازي عطت الاشارة @ يوم خمسطاش اثنين هي الش.....
انفجرت كما بركان تصهد نارا @ وهدت اوكار الطاغية وارتاحت
جابر البيت ان ماح عندا مارا @ وهي ماسكة لازقزقت لا ماحت
فاربع ايام السو طار توارا @ وسيرة ضناها كل وطن اجتاحت

ضناها عطو الارواح موش اخسارة @ بنة ادماهم مسك منا فاحت
بنغازي كبيرة وقدرها الكبارة @ كلمة الحق اصدار بيها باحت
رباية الذايح للاعداء كسارة @ شمعة اتنير وعمرها ماساحت

من طرف **العاشق الصغير** 2012-03-13, 5:15 pm

مشكــــــــــــــــــــــــ يافد ليبيا ـــــــــــــــــــــوره

ياريتك نزلتيها في منتدي الشعر الشعبي

من طرف فداليبيا 2012-03-13, 5:22 pm

نبيها في العام بيش اللي مايعرف بنغازي يتعرف عليها ...مشكور

من طرف أم عمر 2012-03-13, 5:58 pm

شكرا فدا ليبيا على هذا الشعر الجميل على مدينة بنغازي الحبيبة ...

وأهدي أليكِ الشعر التالي :

طيف حالي بالحلا امزهينا

انحبوك يلي اسماك ..

بنغازيناااااااااااا

انحبوك يا العظيمة

وللحب في زولك اقصص قديمة

يا مهجة الخاطر الكل ايودك

الكل يبعثلك غلا وتبسيمة

ما هناك والي اسلم جا في ضدك

انت السامية والعالية ف القيمة

انت امرابطة وحتى اللي في ضدك

يبقى هميم وحالته تخميمة

ياما علي شطك مسحتي خدك

وياما صبرتي ع الزمان وضيمه

وياما ف بحرك موج غنى ردك

لحنك جميل وحلو يا الوسيمة

لحنك شذى نوار يبعث ودك

ف عز الصقايع في شتاء امدفينا

انحبوك يلي اسماك بنغازينا

انحبوك يا ودادة

انحبوك يلي صامتة محتارة

يلي علينا دايما نشادة

ان رحنا بعيد والا سكنا الدارة

ما تواخذينا ان كان بقيت عادة

رحلة احبابك وهجرتي بأمارة

هكي الظروف حكمت بكل برادة

وهكي ايعيش القلب كل امراره

وهكي العين ادموعها سقادة

بعدك نكد هو اللي امبكينا

انحبوك يلي اسماك بنغازينا

انحبوك سيدي حسين

يا صابري يا رويساتنا يا زين

يا فويهات يا سلماني

يا محيشي يا دولار يا بوقرين

يا ليتي يا بركه ويا هواري

يا اسكابلي يا زهوتي والعين

يا اخريبيش يلي فيك كثير معاني

يا كيشنا يا ناسنا الغاليين

يا كل نقطة من بعيد وداني

برنيق* تبقى صرح يوم الدين

برنيق يمي.. الشوق فيك دعاني

برنيق كل العمر لك حنين

برنيق بعدي عليك كواني

يا ريت يقرب يوم اللقاء يا مينة

انحبوك يلي اسماك بنغازينا

انحبوك يا الزكية

يا نفس طيب ف العلالي صار

يا مجدنا يا روحنا جملية

يا مقعد الغاليين والسمار

يا وطن باقي صرح ضاوي ضيه

حتى عدوك فيك راهو حار

علي ما يحاول فيك سوء النية

كنت عليهم كيف ويل ونار

انحبوك وانت لزولنا الهوية

انت أمنا وانت البو والدار

انت اللي الأوقات فيك هنية

ما في مكان ايعادلك ما صار

يا ريت نبقى فيك حتى اشوية

وبعدين نبقى انموت فيك نهار

المهم انت الباقية والحية

ذكراك حتى موتنا امنسينا

انحبوك يلي اسماك بنغازينا

من طرف pure heart 2012-03-13, 6:08 pm

ضناها عطو الارواح موش اخسارة @ بنة ادماهم مسك منا فاحت
بنغازي كبيرة وقدرها الكبارة @ كلمة الحق اصدار بيها باحت
رباية الذايح للاعداء كسارة @ شمعة اتنير وعمرها ماساحت

مشكورة فدا على الأبيات الأكثر من رائعة ..

من طرف فداليبيا 2012-03-17, 8:52 pm

مشكورة ام عمر انتي عطيتي بنغازي حقها اكثر مني

أحلي شعر لأحلى مدينة (بنغازي)

أحلي شعر لأحلى مدينة (بنغازي)

رد: أحلي شعر لأحلى مدينة (بنغازي)

رد: أحلي شعر لأحلى مدينة (بنغازي)

رد: أحلي شعر لأحلى مدينة (بنغازي)

رد: أحلي شعر لأحلى مدينة (بنغازي)

رد: أحلي شعر لأحلى مدينة (بنغازي)