من العاشق الصغير الي(فداليبيا( الاعضاء والمشرفين والاداره

السلام عليكم ورحمة الله وبركاته
اولا اكرر اعتذاري الي الاخت فداليبيا وكي ماقتلك من قبل
ابعقلك ياغالي نبوك اتلوم علينا ونلومك
ثانيا قررت الرحيل من المنتدي ولي اسباب قد يعلم بها بعض الاخوه
واتمني ان مايكون حد زاعل مني وانتمنا اني نسمع عليكم كل الخير
وسامحوني واذا زعلت فيكم اي شخص نطلب منه انا ايسامحني
اخوكم العاشق الصغير

اخي العاشق انا قبلت اعتذارك واسفة اذا زعلتك في شي ...بس كنت حريصة عالاخوة والترابط بين مدن ليبيا الحبيبة..ومانبيش شي يثير الفتنة ..وانت اخ عزيز والمنتدى منتداك ..وارجو منك البقاء في المنتدى ونحنا اخوة وليبيا بلادنا والمنتدى منتدى الجميع ..واللي صار اعتبره عتاب بين اخت وخوها ...

خوي العاشق اولا بارك الله فيك وزدت كبرت في عيني
لكن انك اتسيب المنتدي هذي اطلع منها وانساها من عقلك بكل

هكذا اريد ان تكون العلاقة بيننا

بارك الله فيك اخي العاشق الصغير و اختيفداليبيا
ليس بالضرورة ان يكون الخطا مباشر او مقصود فربما كان غير مباشر وغير مقصود
نعتذر ممن وصله منا ما لا يسره باي شكل كان وليسامحنا فنحن اخوة فالله
نشكر لك هذه البادرة الطيبه اخي العاشق الصغير

اللهم طهر قلوبنا من الغل والحسد والغش ... اللهم أصلح بيننا وبين أقاربنا
.. اللهم أصلح بيننا وبين أحبابنا الاعضاء .. اللهم اجعل الحياة زيادة لنا
في كل خير والموت راحة لنا من كل شر برحمتك يا أرحم الراحمين
واخيرا
اي عضو أخطأت أنا بحقه فأنا أعتذر منه وأتمنى أن أقابله لأقبله على رأسه

والشكر موصول الى كل من ساهم في التسامح

واخيرا اخي العاشق الصغير اذا كل واحد يزعل يغادر المنتدى فانا لا اشاطرك الراي

الفاتحه يارجاله:

انا لا اعرف ماذا حدث بس اتمنى من الاخ العاشق الصغير ...
ان يعدل عن هذا القرار ...لانه من الاعضاء المتميزين .
ونتمى لك الخير والصلاح فيما تريد ....

فداليبيا كتب:اخي العاشق انا قبلت اعتذارك واسفة اذا زعلتك في شي ...بس كنت حريصة عالاخوة والترابط بين مدن ليبيا الحبيبة..ومانبيش شي يثير الفتنة ..وانت اخ عزيز والمنتدى منتداك ..وارجو منك البقاء في المنتدى ونحنا اخوة وليبيا بلادنا والمنتدى منتدى الجميع ..واللي صار اعتبره عتاب بين اخت وخوها ...

بارك الله فيك فدا ليبيا .. هكذا تكون الاخوة والمسامحة وقبول العذر من الآخرين فلك منى كل تقدير واحترام

اما العاشق عندنا معاه كلام ... نبوه يعتذر على اعتذاره ... ويطير الكلام من راسه

بارك الله فيكما اخي العاشق وكذلك اختي فدا ليبيا
اما عن موضوع انسحابك من المنتدا فهذا موضوع لن يحصل ولاتفكر فيه
اختلاف وجهات النظر والنقاش والحوار مطروح وموجود بيننا وللصالح العام
ولمصلحة منتدانا بالدرجه الاولى
فانا اطلب منك التراجع والعدول عن قرارك
~~~~~~~~~~~~~~~~~~~~~~~~~~~

الطلب مرفوض
واذا كان رد الاعضاء لايكفيك فنحن فى الخدمه فقط ماذا تريد
ضرورة ان نتعاون مع بعض من اجل الرقى بهذا المنتدى الى الامام
سوف يتم تشكيل لجنه تحقيق ومتابعه حول الموضوع الذى سبب لك الزعل
نحن ناسف لما حدث وسوء الفهم لايجعلك تتخذ مثل هذه الخطوه فى انتظار قبول اعتذارنا لك ونامل عن قريب عدولك عن هذا الراى والرجوع الى المنتدى

اللهم لاحول ولاقوة الا بالله .........ماذا حدث فى غيابنا لماذا هذة النقاشات ماذا جرى بالتحديد حد يفهمنا وليش العاشق يبى يسيب المنتدى وفداليبيا ليش زعلانة ...وسعوا بالكم يا اخووان نحن اخووة والزعل بيناتنا مرفوض نحن دائماً نبصروا ونهزرووا مع بعض ودائماً اخوة

بصراحه ترك العاشق للمنتدى خساره لقسمه وللمنتدى اجمع
نتمنا من الاخوه الكرام عاشق وفداء ان يغيرو رايهم فالقريب العاجل

انا اتحدث بصراحة وارجو ان تتفهم الادارة صراحتي

فعلي حد علمي ان شروط المنتدي عدم تجاوز الاخلاق والادب

جميل

فلماذا بعض الاداريين يلوون اذرع بعض الاعضاء عن طريق عضو آخر فمثلاً انا اشتكي من عضو فيتم ارسال رساله خاصة له وتوبيخه عن طريق شكوتي فيه

وهناك شخص يعرف عن ماذا اتحدث

فالحريه مطلوبه والعدل مرغوب

وفي النهايه انا اتحدث عن الحقيقة ولا اخشي احد ان كنت علي حق

ولكن الحريه مطلوبه

ولا والف لا للرسائل الخاصة السامة

يا عاشق بطل دلع انت عارف انك منور المنتدئ يا حبيب

انا بصراحه من رائ ان جمال يترك المنتدئ لانه هو سبب المشاكل شنو رايك في كلامي يالعاشق

عشان تكون الامور واضحة امام كل الاعضاء

انا الذي اصمم توقيعات العاشق الصغير

فارجوا طرح الموضوع علي الملأ

او تقبل الخطأ بدون نقاشات وحوارات

وارجوا ان تصدقني القول اخي عبد الحفيظ وتعالج المشكله لانه اذا تركت بلا معالجة فستتكرر ولا ندري ماذا سيحدث مستقبلاً

السلام عليكم ورحمة الله وبركاته
بصفتي صديقه للعاشق الصغير
كنت ندخل اغلب الاوقات كزائره
لكن لمي القيت الموضوع سائلت العاشق لكن استغربت من الجواب لانا العاشق قالي انا الموضوع اللي ساير بينا وبين فداليبياليس الوضوع الاساسي في الانسحاب ولكن
العاشق قالي ان داير موضوع في منتدي الشعر الشعبي وكان امثبت الموضوع
لكن في شخص امغير عنوان الموضوع ومغيرا من المثبت الي موضوع عادي وانه لما كلم الاداره مادارتلش حل وهذا هو الموضوع الاساسي اما موضوع التوقيع حتي هو حكالي وهذا اللي فهمتا منا وكان تبو العاشق عنكم رقمه وكلموه
انا محكيتش الا لمي القيت هذا الموضوع وانتو شوفو ارواحكم

السلام عليكم ...غخوانى الأعضاء ....

تحدثت مع أخي العاشق بالهاتف شخصيا ....

سبب انسحابه ليس موضوع اللبس مع فدا ليبيا ....قاللي لقد اعتذرنا أنا وفدا ونست الأمر

أما الأمر الحقيقى هو حذف موضوع مثبت من القسم الخاص بيه دون علمه واستشارته

علما بأن للمشرف صلاحية المثبت ولا يجوز لأحد تغيير أوحذف شئ دون علمه ...

إنى اخاطب الإدارة بصفتى مشرف وزميل لهم بشكل ودى ...النظر فعلا فى طلب العاشق

فهو محق فيما قاله .... ونأمل التجاوب السريع من الإدارة الكريمة بارك الله فى الجميع

ياجماعه مافي داعي للتفتيش والكلام الزايد
شوفه ياريت تحكي ومن غير الغاز...كان عارف حاجه ونحن موش عارفينها
انا فاهم مالعاشق القصه من اولها لآخرهاوحكى لي وفهمت منه
جماااااااااااال ...ياريت مانوسعوا الموضوع ..سوء خلاف وسيحل
عبدالحفيظ..الموضوع مايستحق لجنه صدقني ..اختلاف وعدم فهم
ولابد منكم كإداره وضع حد لهذه ألأمور..{حق التصرف فالمنتديات التي لديها مشرفين وإذا كان ولابد من إداري إعلام المشرف ولو برساله عالخاص}
فدا ليبيا..لاداعي لانسحابك ..اعتذر العاشق وقبلتي وبادلتيه الاعتذار
~~~~~~~~~~~~~~~~~~~~~~~~~~~
ياريت ياعاشق تتجاوب لطلبات اخوتك واخواتك بعدولك عن ألأنسحاب
من المنتدا....
وبارك الله في كل من قال كلمة خير أراد بها اصلاح ذات البين..

تبية يا شباب يا ريت نحكوا بوضوح وبدون ..... نقط الادارة هم الكابتن مدير المنتدى وصاحبة ونائبة عبدالحفيظ عوض والاخت الغالية زهرة اللوتس وSTAR والاخ عطية طاهر ولكن لا يدخل وااجد ...فالاعضاء او المشرفين او المراقبين ان رايتوا اى شئ من الاسماء التى تما ذكرها فيجب ذكر الاسم بالتحديد حتى يتم تنبية المقصود اما فلان او علان فهذة اعتقد انها غير مجدية ولكن اذا تحدد المقصود فيكون اما الملاء

السلام عليكم ورحمة الله وبركاته
اولا مشكور وبارك الله فيه كل من شارك في اصلاح ذات البين بين العاشق الصغير وفداليبيا وكيما قاللكم جمال وسمر انا تراضين ومافيش اي برانيه بيناتنا والزعل ديما ايسير بين الاخوة
ثانيا العاشق عمر ماقصر في منتداه والحمدلله مانجمل علي حد بشي لكن الاعضاء والاداره والمشرفين انلوم عليهم كلهم انهم ديما مايدخوش عندي الا من رحم ربي منهم ومعروفين وينعدو علي الاصابع
ولمي درت موضوع وهو يختص باشعار الاعضاء يعني شعر من تائليفك حبيت ان ايكون العنوان غريب وجذاب واخترت انا ايكون العنوان ...صقع عليكم ردو كان اقدرتو ...ونزلت فيه لكل عضو شعر زهرة اللافي بوفرقه جمال ميمي المنصوري بيوهارت سميره الكابتن ونشحت فيكم شحته بيش اتردو ويانليلا
وصارلي ضروف وعديت انعالج في مصر وجمال عند العلم وسمر كذلك وكانت ديما تدخل زائره لكن اللي صارت ان في شخص دخل وعدل العنوان ...وهنا نسئل ليش غيرا ...قالو هذهي الكلمه من اقوال القذافي باهي ماعلينا ليش مادزيتولي رساله وقلتوها ؟؟؟؟؟
الامر الاخر معمر القذافي حتي من اقوالا انكم اتغيرو الموضوع من موضوع مثبت الي موضوع عادي ياسبحان الله
وانا كلمت زهرة وكلمت استار وكلمت عبدالحفيظ وكلمت الكابتن
لكن للاسف ماتجاوبت امعاي الا زهرة
ممكن الكابتن كانت طريقة احكاياتي امعاه فيها عصبيه لكن انت المشرف العام مفروض اتحملنا وتساعدنا موش اتفوتني واما استار ماحرك شي عبدالحفيظ حد عزاه قالي انراقبو الموضوع
كيف موش انتو الادارة؟؟؟؟؟
اما اذا كان فيه حد اخر يتحكم قولونا نسئلوه
انا ماكنتش انريد نحكي لكن اللي وصلني من الردود ماينسكتش عليه صح ولا لا ياستار عليش اتدير في روحك مانك عارف شي وانا دازلك رساله وسائلك
وادخلو علي موضوعي وشفوه اللي قاهرتني اني تاعب فيه لوكان موضوع ثاني والله فيها ومافيها
وهذ جزء من مانزلت في الموضوع من العاشق الصغير الي ادارة المنتدي

لومي علي ليداره وع الكابتن اللي أعلي مقداره

لومي عليهم لكن مابو ايحركو من الحوايش ساكن

واللي امغيرا موضوعي لي الخلايق مايجي في طوعي

ليش مادزلي رساله غيره أتقول ايضل في ايضلاله

واللي وجعتني الكابتن مادز اللي والتني

لومي عليهم ديما نين نعرفا لضحك لا تبسيمه

وكان عادها هالكرا نا اللي منا انتبرا منتدي نا اللي عارف سرا



لومي علي ليداره وع الكابتن اللي اعلي مقداره

امابنسبه لي انا عندكم 3حلول واختارو بينهن
الاول انكم اتقولولي من اللي دارها وليش دارها
الثاني اني انرد للمنتدي ولكن بصفتي عضو وليس مشرف
الثالث ارخصولي وبسموح ونترك المنتدي

خوي العاشق الناس تقتل وتسامح
خلاص انسي الموضوع وعد اعيون الناس الي يجدو فيك
وكلمتك ماحد تجاوب امعاك مافيش داعي لها لان مانبي انقولك من ادخل في الموضوع وشنو درنا

يالعاشق ..

هن الثلاث مرفوضة ... وكلمتك يالعاشق هى المفرضة .... امغير ركح

هن الثلاث ماعجبنى ... ابقولك هظ تبعد عنى ....وايش المنتدى بلاك

اغيابك ايزيد ارياف ... والله بلاك المنتدى مومتعاف ... امغير عاود علي

والله يالعاشق نكتب مانكتب مانقدر عليك ...والله يالعاشق لو نجيبوا من مايسد مكانك

سلامى الحار لخوي العاشق ... وسع بالك معانا وخليك وكرامتك محفوظة ...وقدرك كبير

لاالله الا الله شن فيه عين وطارتانشاءالله ارجوكم العاشق وجوده مهم ومكانه كبيرما نبوش نخسروه

أهلا بك خوي العاشق ..

إن شاء الله ما يصير خاطرك إلا طيب

لكن تسيب المنتدى طلعها من راسك

يا العاشق امسحها بوجهي ولو ماترجع العاشق اللي كان قبل وتنسئ الموضوع والله لما نطلع من المنتدئ حتي انا وكلامي امام الاعضاء كلهم لو ماتنسئ الموضوع انا بنطلع من المنتدئ

كل شوي واحد يبي يطلع معش فيها إلا نسكر عليكم الباب

انا نبي نزقب

وين تزقب

الحراسة مشددة ..

ياعوينكم اتبصرو مع بعضكم ومتفهين الموضوع

باهي ربع ساعه بس انجيب حاجه من المحل ونجي

شفتي يا سمر بيور تضحك وتبصر ومتفهه الموضوع
لاحول ولا قوة الا بالله معقوله هكي يا بيور

عارف يامحمد العاشق ديما يحكيلي عليكم وانا نعرفكم بالواحد
وانت بالذات يامحمد حكالي علي الشعر اللي بينك وبينا وانا شفتا لكن كيف ايجيك عزم تضحك وتبصر وصاحبك متكدر ؟؟؟
 

مشكور يامحمد معقولة تبيعنا ..

سمر العاشق قدره محفوظ ..