ملحمة لو كان غير من باب الوفا شاورنا " كاملة "

من طرف **العاشق الصغير** 2012-04-03, 11:52 pm

ملحمة لو كان غير من باب الوفا شاورنا " كاملة "
السلام عليكم ورحمة الله وبركاته

الشاعر ‏الرائع محمد الشيخي

لوكان غير من باب الوفا شاورنا ... ما ايريد يربحنا ولا يخسرنا

لــط رحـيـــلـــــــــــــــــــــــــــــه ... ودار دورت الـعـاقـب نـهـار الـشـيله

لـوكـان غـيـر شـاورنا هذيك الليله ... امـعـاه فـى هـذيـك وهـذى ما قصرنا

امـغير كل حـد عنـده طريق اتشيله ... وحــنـا طريـقـنـا من يوم فيها سرنا ..

الـها اعـيار ما نرضوا اعيار بديله ... واموالف علي شض الحمول ظهرنا

ومـوش عيب لا عاب الخليل خليله ... حــتـى فـالـبـطون ايعاركن لمصرنه !

لـوكـان غير من باب الوفا شاورنا ... مـا ايـريـد يــربـحـنـا ولا يـخـسـرنا

لوكان غير من باب الوفا شاورنا ... ايـريـد يربحنا ولا يخسرنا

رد الشاعر صالح بوعياد الشهيبي

لوكان غير من باب الوفا شاورنا ... ما ايريد يربحنا ولا يخسرنا

لــــــو كــــان رد الــشـــيـــــره ... رانا اخترنا له الراي الخيره

لا انبـصـروا لا نعرفوا تـبصيره ... احنا عـمرنا فالجد ما بصرنا

سوا راينا ايديره سوا ما ايديره ... الــمــهـم رانا جلوته صدرنا

لوكان غير من باب الوفا شاورنا ... مـا ايـريـد يربحنا ولا يخسرنا

رد الشاعر عبدالسلام بوجلاوى الفاخرى

لوكان غير من باب الوفا شاورنا ... مـا ايـريـد يربحنا ولا يخسرنا

عـــزيز الـــقــــيـــــــتــــــه ... من غير علمنا مختار دار لبيته

بلا اسباب سبب بينا تشميته ... الله ايـهـديــه ابـمــوقفا دردرنا

لوكان غير بلغنا ابما فى نيته ... وحط العلل فى لـرض وادابرنا

نين نفهموا منه اسباب بليته ... وليش وعليش ابـغـيرنا غيرنا ؟!!

لوكان غير من باب الوفا شاورنا ... مـا ايـريـد يربحنا ولا يخسرنا

رد الشاعر محمد الممهور

لوكان غير من باب الوفا شاورنا ... مـا ايـريـد يربحنا ولا يخسرنا

لــو كـــان عـــــــــــــــــــــــد رفقنا ... وخـطـم وـشاور قـبـل لا يفارقنا

بــالـــك انـــجــوه ابراي بيه وثقنا ... حــتـى مـا خـذابـه لاخـره عبرنا

وبــالــك ايـشـابـك مـرفـقه مرفقنا ... نجاوروه وانديروا اللى تسترنا

ومنينه على يسار الطريق عزقنا ... صــغـرن اقـداره راه مـا صغرنا

ولايــشــطـنــا مـا صـار لا يـقـلقنا ... هو اخـتـار وحـنـا للكريم صبرنا

لوكان غير من باب الوفا شاورنا ... مـا ايـريـد يربحنا ولا يخسرنا

رد الشاعر عبدالرحمن بوصوكاية

لو كان غيرمن باب الوفا شاورنا .. مايريد يربحنا و لا يخسرنا

لـوكـانـهـو صـــارحـــــــنـــــــــا ... وخــبر برايه قبل مايفضحنا

كـنـّا مـشـيـنا لـعـاقـلـين طرحنا ...عليهم المـيضوع و إشّاورنا

وكـنـّا انـديرو راي في صالحنا ... صـالـح ايـجـمـّعنا وماودرنا

ولاكن خصارا هالعزيز سلحنا ... سلحت قديم الثوب ما دورنا

بــاع الـغـلا واحـنا اللي ربّحنا ... الـلـي باعنا انبيعوه ماكدرنا

لو كان غيرمن باب الوفا شاورنا .. مايريد يربحنا و لا يخسرنا

رد الشاعر السايح البوسيفي

لوكان غير من باب الوفا شاورنا ... مـا ايـريـد يربحنا ولا يخسرنا

لــــــوكــــــان وســـــع باـله ... تعوذ من الشيطان حط ارحال

تمهل صبر ع القيل واللي قاله ... غربل وصفى اللي ابها غسورنا

ركز وشاف وقال شن درناله ... لين فى حفيره حضرته حدرنا

هوعارف اللي ايدير فيه فساله ... رايد ابها فى خاطره يقهرنا

اتقول دم له عنده قديم ايساله ... ما ايجيب غير اللي اتجيب ضررنا

وتو ينفعه لو ما برمش افعاله ... يخسر ابضعف اضعاف ما خسرنا

ويشبح الله فى حالتى وفى حاله ... هللي علي اعروق الندى كورنا

لوكان غير من باب الوفا شاورنا ... مـا ايـريـد يربحنا ولا يخسرنا

رد الشاعر صلاح عبيد

لوكان غير من باب الوفا شاورنا ... مـا ايـريـد يربحنا ولا يخسرنا

لـو كـان حـتــّـــي وفـــــــــــــّــــا ... وزّن امـوره بـيـن كـفـي وكـفـه

عـدْ الأيـام الـلـي لطـمـهـنْ غـفّا ... كـسـر زهـاويـهـن وزاد كـسرنا

نـسـا وقـت كـان بـجـمـرتي يدفّا ... نـسـي كـل شـي اتـقـول مادمرنا

مـاسـال عـنـي كـيـف نـا نـشـفـّا ... فــــ غـيـبـتـه ندعـي الله يـجبرنا

هـمـّش نـدايـا راح نـوري طـفـّا ... نـسـا فـالحـقيقه كان زمان قمرنا

يـاريـت خـبـرنــي وقــال حـذفـّا ... رشــادة غـلانا والبـعـيـد دفـرنـا

الـلـي واجـعـتنـي خـدعـتـه بـالعفّا ... قـول الـلـطـافه قـول بـيه بـهرنا

الـلـي واجعـتـني كنت نا في صفّا ... ونـحلف عليه انقول مايغذرنا

أمـأمن اسـراري لـيـه داخل رفّا ... غـربـال تـاريـتـه وزاد كــدرنـا

يامـا زرعـنـا اورود هـو صـيـفّا ... يــامـا حـكـيـنا ع الـغلا وسمرنا

يـامـا يـامـا . شـوق يـامـا صفّا ... ب أكلاش الجفا فرغ وماعبرنا

تـاريـتـه غلانـا كـان عنده نفّا ... استشق . تكيـف بعدها وطمرنا

الحاصل وجعني ماحكالي وحفّا ... شـور الجديد اللي كسر خاطرنا

لوكان غير من باب الوفا شاورنا ... ايـريـد يربحنا ولا يخسرنا

رد الشاعر صالح العبار

لوكان غير من باب الوفا شاورنا ... ايـريـد يربحنا ولا يخسرنا

ياريــــــــــــــــــــــت جا وحكالى ** وفضه على روحه وجا وشكالي

يلقانه سند واصحاب له فالتالى ** والـحـمل الـثقيل انشيل لو يدبرنا

ونحموا الرمية كان جانه جالى ** وانشيلوا عـنـاه الجار لا جاورنا

ونحمل العيب ودوم واسع بالى ** ما اتدردره حـاجـة غريـق بحرنا

لوكان غير من باب الوفا شاورنا ... ايـريـد يربحنا ولا يخسرنا

رد الشاعر ناصر أبوعجيله الشيخ

لوكان غير من باب الوفا شاورنا ... ايـريـد يربحنا ولا يخسرنا

لــوكــــان هــو راجــعــــــنـــــــــا ... واسمع راينا واحنا ارياه اسمعنا

لو كان هذا درنا راي زين جـمـعـنا ... وقرعتنا عطى فالراي وادابـرنـا

خـذا رايـنــا والله اريـاه اتـــبـعــنـا ... المـهـم رانـا عالصلاح عـمـرنـا

لــــــــــــو كـــــان رد عـــلــــينــا ... رانــا عـطـيـنـا والـكـلام خـذينـا

ورانــا عـلـيــه ابــرايـنــا رايـيـنـا ... وبالراي السليم امعاه ما قصرنـا

والله جاب راي مقنع و بيه ارضينا ... الـمـهـم بـالشـيـره جبر خاطرنا

لا ديــن سلـك لا سـلـك فـى ديــنــا ... بلا امشاوره سافر عزيز هجرنا

لوكان غير من باب الوفا شاورنا ... ايـريـد يربحنا ولا يخسرنا

رد الشاعر اكرم الكاسح

لوكان غير من باب الوفا شاورنا ... ايـريـد يربحنا ولا يخسرنا

لــوكــان غـيـر تــبـــاطـــــــى ... وجــا سـالنـا الشيره انفكو ارباطه

موش هك يرحل فالخفا بزقاطه ... لاعـــد خــاطــرنــــا ولادورنـــــا

ولاكـان شـامـت دارنــا رغاطه ... ولا كـــان لايـــم لامـنـا ونـزرنــا

بـالـي الـرقـيـع اتفسده لخياطـه ... وبــنــي الخـيـا لاسـبـد مـايـقبرنا

لوكان غير من باب الوفا شاورنا ... ايـريـد يربحنا ولا يخسرنا

رد الشاعر خالد المجبري

لوكان غير من باب الوفا شاورنا مايريد يربحنا ولا يخسرنا

لوكان في تخطيمه ... جانا وسكرنا املاف قديمه

لكن بلاتوديع راه ظليمه ... لنا الله وهو اللي ايصبرنا

علي بيعته لنا بلاتسويمه .. وعن كسرته ابقل الوفا خاطرنا

وعن جرح تمه غير ناقل ديما .. من جية الشامت اللي خبرنا

وعن عين مازالت الها تبليمه .. من يوم مافارق فراق قهرنا

وكان غير شاورنا بعد تسليمه .. بالربح قلنا له وماكدرنا

وكان غير من باب الوفا شاورنا مايريد يربحنا ولا يخسرنا

رد الشاعر ابو ريان

لوكان غير من باب الوفا شاورنا ... ما ايريد يربحنا ولا يخسرنا

لو كان يا غالينا .... خدينا معاك وفى الكلام عطينا

نخلط ونقسم ماعليك علينا ... وندفع الزائد كانا قصرنا

الا اللوم مانقبل نهار ايجينا ... نكبر مع الميعاد مايصغرنا

لوكان غير من باب الوفا شاورنا ... ما ايريد يربحنا ولا يخسرنا

رد الشاعر حافظ سليمان الشيخي

لوكان غير من باب الوفا شاورنا ... ايـريـد يربحنا ولا يخسرنا

لو كان هو جارحنا ** شاور نهار الشيل ما انجرحنا
لا ايريد يشرينا ولا يربحنا ** ولا يزيح عنا همنا وكدرنا
يامه امعا جاوى الصوب مدحنا ** لو الشور رده را ابراي عمرنا

لوكان غير من باب الوفا شاورنا ... ايـريـد يربحنا ولا يخسرنا

رد الشاعر عز الدين التريكي

لوكان غير من باب الوفا شاورنا ... ما ايريد يربحنا ولا يخسرنا

لو كانهو راجانا .....لو كان ع اللي ف خاطره حاكانا

ما كنت نا و العين يوم حزانا ..... لا كنا درفنا دمعنا غدرنا

شد الرحيل بهونته فاجانا.....عدى رقد مو عادته يسمرنا

جرحه صعب مصعب على نسيانا.....يا مسهل عليه اطياح ما عمرنا

درفنا علي اللي بسيته كافانا.....اللي قبل ما يغدر اليوم غدرنا

ياما مشينا بشوقنا و هوانا ...وسط الجناين مانهار عثرنا

وسط الجناين دايرين عزانا .... ف كل الامكان حلمنا بعثرنا

انتمم كلامي بالصلاه لمولانا .....عوضي عليه ان شاء الله ايصبرنا

لوكان غير من باب الوفا شاورنا ... ما ايريد يربحنا ولا يخسرنا

رد الشاعر سالم محمد درياق

لو كان غير من باب الوفا شاورنا .. ما ايريد يربحنا ولا يخسرنا

لوكان جا ونشدنا .... رانا اللي وسط القلوب جبدنا

وراهو رسم ميعادنا ميعدنا....وقلبنّامعاه الراي واشاورنا

ومع حضرته درنا حدود جهدنا .... لين نقنعوه بشي كان اقدرنا

وشلنا معاه رحيل واسقدنا ....... كانا علي شيل الرحيل جبرنا

امغير هو رحل خلا وراه عددنا ...ولومة ومية كسر في خاطرنا

من هول دورته فينا فرح حاسدنا...الله ايسامحه العزيز ويصبرنا

لو كان غير من باب الوفا شاورنا .. ما ايريد يربحنا ولا يخسرنا

رد الشاعر خالد أقشيرة

لو كان غير من باب الوفا شاورنا .. ما ايريد يربحنا ولا يخسرنا

لوكان هو لمحلي....مانبيه يطريها ولايشرحلي

نفهم على الطاير ومايوضحلي....ونكونو تفاهمنا وهك اخترنا

مايقولها علني ولايفصحلي..... ويشوه حلاوة صورتا ف خاطرنا

وان كاني مخطي نبي يصححلي... استاد هوا وطلبته دايرنا

لوكان غير من باب الوفا شاورنا ... ما ايريد يربحنا ولا يخسرنا

رد الشاعر مفتاح بوحرق المغربي

لو كان غير من باب الوفا شاورنا .. ما ايريد يربحنا ولا يخسرنا

خذاني بوقه ** عزيز غربي مازلت نا فى شوقه

جرينا امعاه وماعطانا روقه ** اياماً واشوقه بي ,, ما عبرنا

وشريته ابراس المال عامر سوقه ** مصوقرينه مضمون ومصوقرنا

عذره عطيب وحجته ملقوقه ** صدمنه جفاه الشين ومقطمرنا

وبعد عاقني ما ارضيت يوم انعوقه ** انفكن ارمامي وانكسر جابرنا

عزيز باعني بطلوق ما مطلوقه ** خلف امواجع بي نين شعرنا

لو كان غير من باب الوفا شاورنا .. ما ايريد يربحنا ولا يخسرنا

رد الشاعر عبدالرحمن عابد المغربي

لو كان غير من باب الوفا شاورنا .. ما ايريد يربحنا ولا يخسرنا

لوكان غير من باب الوفا ودعنا ** وجاب راي مالرايات بيه قنعنا

لوكان هذا سامحناه ما توجعنا ** مشيت عزيز وهلبته موكرنا

لوكان دارهابالك اتقول صنعنا ** وجت من جنابه فائده صبرنا

لا يضرنا جفواه لا ينفعنا ** امغير موجعه وارحكت فى خاطرنا

على كل حال احسابنا راجعنا ** امعاه مالقينا عيب به يذكرنا

وما عمر ما كلمة العيب اسمعنا ** منا ولا فى ما مضى صغرنا

الشى المحيرمن طرف لا يعنا ** قبيته مشى فالسر ما خبرنا

لو كان غير من باب الوفا شاورنا .. ما ايريد يربحنا ولا يخسرنا

رد الشاعرة عهود العريبي

لو كان غير من باب الوفا شاورنا .. ما ايريد يربحنا ولا يخسرنا

ساق رحيله ** كيف نو قاطب ماطره فى ليله

انادي عليه وما نداى اصغيله ** عدى ابشوقنا وزاد الزمان قهرنا

والعين حايسه وبدمعها ترعيله ** ولكان هامته ما صفوها عكرنا

ناضت اتشالى بالغطا توميله ** وجثامة رحيله اتقول ( حيه ) اخسرنا ,,

لو كان غير من باب الوفا شاورنا .. ما ايريد يربحنا ولا يخسرنا

واسلمتوا

م ن ق و ل

من طرف فرج احميد 2012-04-05, 11:32 am

كلام طيب تسلم اخى العاشق

من طرف **العاشق الصغير** 2012-04-07, 6:27 pm

مشكـــــــــــــ فرج أحميد ـــــــــــــــــــور
علـــــــــــ الامرور الرائع ــــــــــــــــــــــــــي

من طرف اميتاب 2012-04-10, 11:16 pm

ياسمح الحكاوي يابودي ماكيف الدواوي
كلامك شعر مايلقاه راوي
كلامك نثر مكتوب بفصاحة
كلامك طيف من كل الجلاوي
كلامك شهد ماقنيو اجباحة
كلامك ورد يطلق فى شذاوي
كلامك موج راكح لسباحة
كلامك كيف ممخوض الشكاوي
وين ايجيك طرفة فالقداحة
كلامك غيم عقب حس داوي
صيم وطن به ناسه فراحه
نلقا وين كيفك يااسطاوي
وين الليل ماخيم جناحه

من طرف **العاشق الصغير** 2012-04-13, 10:38 pm

مشكــــــــــــــــــــ أميتاب ــــــــــــــــــــــور
علي المرور الطيب

من طرف **العاشق الصغير** 2012-05-10, 2:27 pm

مشكور علي المرور

ملحمة لو كان غير من باب الوفا شاورنا " كاملة "

ملحمة لو كان غير من باب الوفا شاورنا " كاملة "

رد: ملحمة لو كان غير من باب الوفا شاورنا " كاملة "

رد: ملحمة لو كان غير من باب الوفا شاورنا " كاملة "

شكر

رد: ملحمة لو كان غير من باب الوفا شاورنا " كاملة "

رد: ملحمة لو كان غير من باب الوفا شاورنا " كاملة "