مختار الطاهر الغول: طرابلس يا طايحة السعد والمزّال (1)

من طرف **dude333** 2012-06-03, 7:05 pm

مختار الطاهر الغول

مختار الطاهر الغول: طرابلس يا طايحة السعد والمزّال (1)

27/5/2012

طرابلس والله صار حالك يبكى
وصرت لبانة على كل لسان
ياما شفتى وياما شقيتى وياما تعبتى
وياما حزنتى وياما بكيتى
وياما صبرتى على ظلم الوخيان والعدوان
شوق ما داسوك وعفسوا عليك وظلموك
وكل الهموم حملتى
وكنت يا ميمتى حاملة الكل بالاحضان
حسبتيهم كلهم ولادك وما فرقتى
بين الرجبانى والبرقاوى والمصراتى واللى جاك من فزان
هذا سكن فى دويرة وهذا سكن فى دكان
وهذا سكن فى براكة خارج الكردون
فى باب عكارة وباب بن غشير والعالمين
وعشتوا كلكم احباب ووخيان
وكلكم مسلمين وعربان
ووصيت اصغارى واويليداتى يكونوا حنان عليكم
فيكم الزوالى وفيكم اللى ما عنده قوت نهار
علموهم النظافة والأدب والاخلاق والقانون
لا تعادوهم ولا تعزروهم وانسوا قبيلته والمكان اللى جى منه
يصيروا اولاد مدينة ويعرفوا كار العلم والورد واالمشمومه
وخلوا المهندس داسكولى الطليانى
يخطط احياش شعبية للفقير والقزون والزوالى
هكى وصى العزيز الغالى وهيكى يا صغيورتى تنبنى الاوطان
كلنا اولاد بونا آدم لا فينا ابليس ولا شيطان
وعشنا سنين لا موجعة فى القلب أهل ووخيان
وفى يوم غايب صبحه جى خازوق لا دين ليه ولا ملة
كله سفتلة وتبلعيط وكله خصاله سية
وجاب معاه همج لاهم اولاد أصل ولا بيتيه زحفوا عليَّه
وتفركست البيعة وضاق الخاطر وغرغرت الغرغاره
وشفت الويل اللى ما شافته مدينة والهم اللى ما تنفع معاه دباره
عمرك سمعتوا بهيم حاشاكم يلز الصيد نين توارى
سمعت كلام معفن ما يقوله واحد علي القيمة
هرواك هبلاك كثر هبالة يبى يقود الناس بالشكيمة
ونهشوا لحمى كيف الكلاب الدايحة تنهش جيفة
وظلمونى وداروا دير ما داره لا المغول ولا الطليان
كنت بين الامم معروفة بنظافتى ونظامى وقانونى
واليوم كنايسكم فى كل مكان مرميه وصرت خرابه
نزحتوا ميَّة البير والماجن والفسكية
لا تزعلوا يا اخوانى ولا تلومونى راكم سمعتونى كذب مفلق
والكرموس يوفى والورق يتورق والموجعة فى القلب ما تتدرق
وهيا يا وليدى احكى حكايتى حكاية الهم والقهرة
بعد ما كانت لي شنَّة ورنَّة صرت اليوم بين المدن عزَّاره
احكى وخلى كل واحد يعرف حده وكل واحد يعرف كاره
مش خوكم البنغازى يقول مرار العسل وحلاوة المرارة
احكى حكايتى وكيف طفح الكيل وفاضت المرارة
كيف مسلسل عبدو الطرابلسى (ثلاثة فى دكان) حلقه حلقه
وخلى عنوانها طرابلس يا طايحة السعد والمزال
التوقيع: طرابلس طايحة السعد والمزال
مختار الطاهر الغول

من طرف محمد اللافي 2012-06-03, 7:13 pm

بخت طرابلس انها كانت ومزالت وكر لعناصر الفساد لكبرها وتنوع التركيبة السكانية فيها من كل انحاء ليبيا وقبائلها ساهل انك تنصهر فيها وتختفي
وصدق بعد قال طايحه السعد والمزال ما واكلها الي راقد الريح الي في طرابلس

مختار الطاهر الغول: طرابلس يا طايحة السعد والمزّال (1)

مختار الطاهر الغول: طرابلس يا طايحة السعد والمزّال (1)

رد: مختار الطاهر الغول: طرابلس يا طايحة السعد والمزّال (1)