امطارح ساسي ابيات شعريه جميله

مشاركة بأبيات شعرية من: محب للوطن

امطارح ساسي
بين مسح دمعي بين حكّت راسي
بين ضيق علمي بين ضيق انفاسي
بين مسكن امصقّع كارهين انجوله
لاهلت عندي لاكلام سياسي
لا الكيب نعرف لا مدحّت اجلوله
لاامقريف ولازيدان حسّوا احساسي
لاشلقم وبوجبريل حزب اصلوله
لاهجرة ولاتكفير نقتل ناسي
ولااني الدين نمسك دولة
ولااني معا معمر سرقت وناسي
وينما الناتو تاق غيّر قوله
ولابايع سلاح ولاجبدت امواسي
ولا سرت سارقها وهي محلولة
عايش بصبري ف السنين انماصي
وسميع وعليم وهو اللي ندعوا له
انريد النظر بالعمر ربي يواسي
ويجعل ذنوبي كلها مغسولة
ويعيني علي ذكره صباح وماسي
ويشيل ليبيا شور امنها بسهولة

******
وربي يحفظلنا هالوطن ونكونو خوت علي قلب واحد وبما يرضى ربنا عز وجل

ابيات جميلة تحكي ما يجول في خاطر كل ليبي محب لوطنه حبا طاهرا بعيدا عن المزايدات السياسية والصراعات الفكرية ,,,,,

صح اللسانك وحقق الله آمالك

انشاء الله جميع اليبيين يا رب