كلمة و رد غطاها بين الفكحال و نعيم الزوى

قصيدة من شاعر الزنتان ايمن الفكحال الى بنغازي

مـــــزال يا شــــراقا تــــنــدهو تلقونا ... وعارفينكم في الجــد ماتـــخلونا
عارفـــــيـــــنــــكم تــــــراســـــــــا ... ومن حق فارسكم يعــلي راصــه
أبطـال فالحروب أرزان في السياســه ... في قاموسكم ماتعرفوش الخونه
كبـيـر فــضلكم علي الوطن مايتناسا ... ومزال ليكم ناسنا ممـنونـــــــــه
انتم لهذا الوطن خيــــــرة ناســـــــه ... غلاكم كبير وناسنا ماتـــهونــــه
انتم عز دوم لـــــــــوطنا وحراســــه ... معروف صيتكم في وطنا ومادونه
• وبنغازي الحبيبه الــطـاهره الوناســه ... بدت عاصــــــمة لقلوبنا الحنونه
زنتاني بشعره يوصف في إحساسه ... بمشاعر وفيٌه في خاطره مدفونه
ونرسل سلامي لشرقنا ولـناســــه ... وفي الرد نرجا ان كانهم سمعونا
مـــــــــزال يـــاشــــــــــــــراقــــا ... في الوقت الفزع رانا من البـنداقــا
وان طق طبلكم فيسع إنجو سـباقا ... علي شانكم لو نكملو ويفنونــــــا
لاجل خوايا بـــيــنا وعِـــلاقــــــــــا ... عــــلاقة محبه صافيه ومــوزونــه
وعلي قــلــب واحد سايرين رفـاقا ... رفقة اجواد موثقه ومــــضــمــونـه
• رفـقـة تـريــس وقاهره البـقـباقـــا ... وخلت الحاسد كبدته مــسـحونه
شاعــــــر ابياته خاطها في اوراقه ... لـــكــن غــلاكم حاطه في عيونه
وعلي بعد المسافه نجددو لملاقا ... واتــجـيكم تريس وبالتريس إتجونا
ووديان المــحــبـــه بينا دفاقــــــا ... صلا عل النبي بالعين لاتــــضرونا
مـــــزال يا شــراقا تــنـدهو تلقونا ... وعارفينكم في الجـد ماتـــخلونا
------------------------------------------------------------------------------

رد من الشاعر نعيم الزوى على ايمن الفكحال الزنتانى بلسان مدينة بنغازى

يازنتاني ..
لاجل كلامك هزنى بكانى
واجب على الرد
(( يازنتانى ))

صوت وصورة
طلعتوا مسيره شامخـــه مشهوره
معــــانا ضهرتوا مـــن بزوغ الثــــورة
عملكـــم الثاير مـــا انسيته رانــى
انتوا صيتكم واخــــذ اليوم النــــوره
ومعروف جدكم شن دار فالطليانى
كتبتوا على صدر الزمــان اسطوره
رسمتـــوا ملاحــــم عـــز يا حبانى
فـــوق الجبل كنتوا تقـــول صقوره
تاريخكم محفـــور فــى وجــــدانى
جهادكــم ماصـــــار ف المعمــــوره
ولا ريت منكم شى عمل عدوانى
من قال فيكم شى مـــن مخسوره
معـــــروف اصله طينته نصــــرانى
طابور خامـــس شوكته مكسوره
صيـــور يفنى كيف سيده الفانى

كيف انرد
ونحكــى عليكم وين صــــار الجـــد
وكيف بالقصــــايد بالمـــديح انبـــد
وكيف القلــم يلقى اليـــوم معانى
ماضنى عليكم شى قصيدة اتسد
ولا شعــر نلقى ولا كتاب اغــــانى
خذيتوا مكانه مـــا خـــــــذاها حـــد
ومـــازال عاجــز فالكــــلام السانى
تاريـــخ درتـــــوا والـــزمـــان ايعـــــد
ومعــــروف من مجنى عليه اوجانى
وعالظلــــــم ديمــا واقفيـــن بضـــد
مــالطفـل للشبــــوب للشيبـــانى
كراديس جيتـــوا وين صـــار الهــــد
معاكم انسيناهن حـــروب الهانى
للشــــــــرق كنتــــوا عـــون يد بيد
ترتيبكـــم معــــروف كــــــان الثانى

الشاعر نعيم الزوى