ان حكَيّتن عقرّن شيب .. وان سبّتن طال داهن

الشــاعر روفــه الدعـبـوب الـرفـادي رحِمه الله

ان حكَيّتن عقرّن شيب .. وان سبّتن طال داهن

لا عمرهن فاضن بعيب .. ولا يحملنه ان جاهن

أن حكَيت راسى تغّير .. واكسى ابشيب وانا صغّير
والصاحب اللى طامع ايدير .. نكر الحق وازعم اعداهن
عليك هم سولتن اتحير .. متعاكسات ماصفين ارياهن
وامصبتين مابينهم اتخير .. آما الموت والله عماهن

أن حكَيت زادن ازياده .. وشيل حملهن جاه مكاده
والصاحيب صبو اضداده .. وقالوا اوجوهنا خطاهن
آما يشربن من صراده .. والله عسف يلون اضماهن
ولم كيف لم اللماده .. فيه مايطين ابناهن

ان حكَّيتن دارن علايم .. وباب تركن فيه الندايم
واشداد عزم ماحال دايم .. ليام ع المولى اكفاهن
مجبور خيطهن بالولايم .. ومنقوض ناير سداهن
اوبلا مزن سيلهن عايم .. ومالنشل ذايب ارشاهن
مرات في فرحن هايم .. ومرات حاير عزاهن

ان حكَيتن دارن اتلع بيض .. وم الحمل صايف مريض
وليلهن كمل بالجضيض .. سمار صلب والنوم مالفاهن
وعصرانات ماوالفن غيض .. وجا العيب ملى بداهن
عزاهن حدر دمعهن فيض .. مكيونات صاعب دواهن

ان حكَيت شيب الحسايف .. وم الحمل ذايب وصايف
منهن ع الميته امرايف .. عندى خير م العيشة امعاهن
يامر لوم العسايف.. م الصاحب الدانى انجاهن
أن قلت لا يبقن كسايف .. وان واقفتن في مبركي واهن

ان حكَيت يكسانى الشيب .. اونا احملت حملى صعيب
وغلطان كان كافيت بالعيب .. وايجى فالقرايب اكفاهن
ومرات ما امعايه انخيب .. ويصعب عليه جفاهن
ومرات نرضى بالنصيب .. ونقول فرض نترك عناهن
ايجن وينما نومهن ايطيب .. امهاياه ويقلن هناهن
وشيالاتن حراديب .. ماشدن حوايا اضراهن
امريبات م الفز ترتيب .. وع المشى قاصر اخطاهن
ان حكَيّتن عقّرن شيب .. وان سبّتن طال داهن

تسلم اخى عبدالحفيظ