خذوا الصقر غادي لبسوه اكمامه

خذوا الصقر غادي لبسوه اكمامه......خطر علي ميام كيف ميامه

غـم عيونه......ولا تعال احذاه واقعد دونه

المهم تبقي خزرته مركونة......لا نريد وجهه ولا نريد اصدامه

حرك اللي كانت خفا مدفونة......ونقض الجرح اللي صعيب الليامة

لبسة كمبيلة......واسوال النبي تالاي لا تجليله

فيه النظر ما عاد نريد انشيله......خطر علي عيون سمح ابسامه

اذكرت ماضي من سنين طويلة......سحبني وراه ورحت في دوامة

اياماً وقته خاطري زاهيله......ورايق بصفو الحب وانسجامه

مع بنت شوعة وجيلها من جيله......قريبة الدم ومن بنات عمامه

عيونها غني مولاي ع التكحيلة......دفينة خذوا منتوجها فحامة

انهفت عليه العقل يطول ليله......ويبقى كما عيل جديد افطامه

سايق عليك اللي فزع لسهيله......فارس سعيدة اللي شهير مقامه

فينا جميل ونقبلوه جميلة......الصاحب ايشيل الطير من قدامه

عيونه واري......وحذاي لا تجليله انريت حباري

مكبوس خير ما يحوس علي افكاري......ويظهر علل داير عليه كتامة

تقول في متشمت بطول جذاري......نزال الديار العوج طال مرامه

داي من عيون وجن عيونه ......زقيت لاي عيبة ولاي حشامة

تزقاية اللي مغشوش غفة شاري......علثر الندم حطت عليه غرامه

تزقاية اللي ف الدين عالم قاري......عليه امحرمة حلا ابليس صيامه

تزقاية غزال انس الدنو بكاري......قناصة ابعا قلة النياق تحامى

تزقاية طليب مع افواه غداري......قدام من ايسال ونقله بحرامه

تزقاية غريبة نجع جاها طاري......وحيدة ولد سلت البيت ارمامة

تزقاية اللي ف الدم سمه جاري......بكبده علي وجه الوطا يترامى

ولا هروب ينفع من امقدر جاري......ولا تفيد في رادة الله ندامة

ارحمني عيون الصقر عني واري......ملسوع المجاحر ما يجي العدام




شيلة علل القفازة......وخلا امكمم فوق من مركازة

دلال م الرفاقة عارفين انقازة......مفتاحه ميامي سود باب كلامه

طربهم انجر العود قال اعزازة......ارباب الغلا داروا عليه كلامه

ايبانن افعال العما في عكازه......بروحه نصب فخه وطاه بقدامه

ومانا منلي لوسطهم هزازة......علي لحن غربي نرقصوا لنغامه

نشيلوا الكف وللغني طربازة......وشتاية ان جا رادح جديد احرامه

والفا ولخلا برواحنا قحازة......اهروب من مشاكل واجدات ويامه

ونزهة اللي منا يطول اجازة......يظهر علي وادي المري واوهامه

وقارة السدادة بقزها تقازة......وعلي ضيفنا وقتن لفا عزامه

ونقابل بلط نثله اتقول قزازة......وحط العصايب فوق روس ارسامه

بين الديور لدارنا هندازة......منازل اتحيد ع لقلوب غمامة

وفوحة نشاشيحه مع قرقازة......تسحر الروح مع هبوب انسامه

وبجل وجداري نارنا وزازة......وهوارة بها نور الخلو ظلامه

وبكروزر هميل الهودلة لكازة......ودياره علل القناص به خطامة

وجدي الغزال وهو اشواته طازة......سايلبها ديما الريق اجمامه

وان كان صار شيل وحط له رزازة......ومانا عليه امرومين اروامة

كمين غرد يسفا شاقين اكوازة......ايلين اللي ماهن ارقاق عزامة

ونخرموه بالجوزة وبالحجازة......وبسهيل وينما جديه اغبي في غيامه

بوادي شوامس امطرزين اطرازة......علي كل غابي عندنا نخرامة

خطرها الاجور الزمان ابعازة......ورضاي بقضاه وطوعتي لحكامه

وان طال العلل ماني اللي قلقازة......انفصل الثوب ونبخصه بكامة

لاهو قداه العيب لا يجازى......الصقر م لذهب مدقوق رمز شهامة

خذني عيونه وين حق محازة......وعدي لها م لرض علوة قامة

وسيب اللي في الارض صدره وازى......ورا خارمة رق الجناح تعامى

بزاره عليه الغيم دونه حازه......وححا وراه وله اسماح انغامه

روح بها ودمومها نزازة......وسيده تبسم لتوقته بسلامة

سالم الجناح ودوب له نهزازه......مضلي وعنده فالوطا علامة

واركز وها واله وجا بمجازة......سبحان كي هداه وعلمه علامة

مكتوب غير من عينه انحك حجازه......حسوفة علي غالي مشى باحلامه

عشى الطير وخلها اتوازى......ان كان ف الرفق عندي عليك ملامة

وان كان تم تجلايك احذاي عطازة......اعزلي ونجلا وكل حد بقسامه

اخذوا الصقر غادي لبسوه اكمامه......خطر على ميام كيف ميامه



المرحوم روفه الدعبوب
مع تحياتي