قصيدة للشاعر عبد الله بالروين

قصيدة
للشاعر عبد الله بالروين
أتجيبن كبير الشان يابطون النساء
واتجيبن كبير النفس والحمال
واتجيبن اشداد البأس وابطال الوغا
وإيحامو اللى خايف بكل افعال
واتجيبن ايدين اتجود فى المد والعطاء
وايروفن على القاصر ضعيف الحال
اتجيبن ايدين ابخال تشبه للوطا
اللى مجدبه واجد جدبها طال
واتجيبن تريس اسماح شيمتم وفاء
وفى الكرب تلقاهم ان ضاق الحال
واتجيبن تريس امغير تيهارت رخا
وفى الكرب مامنهم إيبان خيال
واتجيبن اللى يغشوه جبارت العداء
واتجيبن ضعيف القلب والذلال
واتجيبن اللى لاقال فى القول افتراء
ولاالناس تاخذله كلام ان قال
واتجيبن لذيذ اللفظ لناس لاحكا
كلامه نقى كله زهاء للبال
واتجيبن اللى فى الوجه صاحب مسمحا
وايخونك بعد وقتك تبرّم مال
واتجيبن اللى فعله مخالف مظهره
الليقه ملاك وهو ردىء لفعال
واتجيبن اللى فى فاهق الخلاء
إيدير خفيف العظم موت تنبال
واتجيبن اللى لامات ماعاد ينفدا
واتجيبن اللى موته صحيح حلال
واتجيبن اللى لابان يلفالك كدا
ولاغيبته تطلق عليك اخلال
واتجيبن اصقوره فوق ركازت العلا
حتى اعشوشة فى اعلى اعلا لجبال
واتجيبن اللى عاقل وين ينهى عالخطاء
واتجيبن اللى للصادقه زعال
واتجيبن اللى جوفه امعبأ بالهواء
شهيق وزفير امعا خليط اهبال
واتجيبن اللى جياب لفخار والثناء
واحمول فوق من حمله الهن شيال
واتجيبم اجواد صحيح ماهم للغباء
شبيهت ضنا شيحة اولاد اهلال
حتى فى المنام ان جوك يلفالك زها
لجواد عز مابعد لجواد ارجال
اجعنهم ضنا لجواد ديمه فى هناء
يامن ترسى فى الوطا بجبال
ان غابوا يغيب الخير ويغيب البها
الدنيا بلاهم طعمها يتفال
ولجواد دون الجار فى يوم البلاء
ايشقو لهيب النار بلرجال
ولجواد عز الضيف وقتن ومالفا
حتى وهم فقاره جودهم هيال
وفى اوجوهم تلقى الطيبه والحيا
خير من طعام لذيذ بين ابخال
والجود كنز من عند الجلاله ينهدا
على ناس ماهم واجدين اقلال
وايبان كيف الشمس فى وآن الضحى
اللى نورها مايحجبه غربال
الجود بالارواح وبالاموال وبالضنا
الجود فعل لاكذب ولاكلام انذال
والجود كيف الغيث خلاط الثراء
ايحايى اعروقن عودها مذبال
ولولا ضنا لجواد شيالت العنا
ما بالمحاسن تنضرب لمثال
يامن اتسير فى كواكب فى فضاء
وامسخر الكلتن ايكون مجال
يالله ياضامن عشايا والغداء
وللنمل خالق فى الوطاه اوكال
وخالق اوجوه اسماح مليانه سخاء
وخالق اوجوهن شاحبه وانذال
اجعنهم ضنا لجواد شجرة مثمره
اللى بجودهم ماإيخيبو لامال