مقالات مختارة : محمد بن سليم و فِك المارشا (4)

من طرف **dude333** الجمعة 04 مايو 2012, 8:16 pm

محمد بن سليم : فِك المارشا (4)
4 مايو 2012

فِك المارشا مجموعة من الخواطر تحكي عن الهموم الحالية للمواطن الليبي بطريقة ( هم يضحّك وهم يبكّي) ، ومعلش يسامحونا جماعة اللغة العربية لأن (فِك المارشا) ح تكون بالعامية لأنها زي الهدرزة بين اي اثنين ليبيين …

ــ فكينا المارشا ياسيدي .. ودرّسنا عل اليمين .. نعم ؟ شن تبي بعدها؟ تبي تقولي عدي سجل في الانتخابات؟ تي أي انتخابات وجماعة معمر ماسكينها في ليبيا وبره ليبيا أخرى ..

ــ تي امغير اهدى وقول هديت .. تي عدي سجل وانتخب اللي تشوفا كويس بيش يقدر يوصل صوتك من بنغازي .. وغيرها وغيرها من باقي المدن .. وشويا شويا يبدو يكنسو جماعة معمر .. بس في البداية ضروري تسجل .. صاح ولالا؟

ــ باهي وياسيدي سجلنا .. وانتخبنا .. وقعد عندنا ناس على كيف الكيف يشيلو أصواتنا .. وين يبو يشيلوهن؟ للمجلس؟ ماهو يبو يحولوه ويجيبو المجلس الجزء الثاني .. مش عارف حاجه انتقالية اخرى .. قريب حتى نحنا نقعدو الشعب الليبي الانتقالي ..

ــ ياراجل ماهو حتى بعد يشيلو المجلس ماهو نحنا نبو ننتخبو المؤتمر الوطني العام .. وحتى هما يقدرو بعدها ينظفو البلاد لأنهم جو في المؤتمر عن طريق الانتخاب ..

ــ باهي وتوزيع عدد المؤتمر؟؟ ماهو ماغيروش عدد الكراسي ويخلوها بالتساوي .. عليش نمشي وننتخب للمؤتمر الوطني وهما مايبوش يخلو توزيع الكراسي بالتساوي؟؟؟؟

ــ عليك قصة درتها وأنت تعيط .. وياريتك فاطر أخرى قبل ما تطلع .. باهي ياسيدي ماهو قررو لجنة الستين .. عشرين من كل أقليم .. وهما اللي يكتبو الدستور ويقولولنا … ها ياشعب .. عجبكم؟ نعتمدوه؟ ولا نغيرو فيه ؟

ــ خرررف .. ماهو المؤتمر الوطني هو اللي يبي يعين لجنة الستين .. صاح ولالا؟ معناها مرات جماعة الغرب يحطو اللي يبوهم في لجنة الستين .. ويمشي الموضوع لأنهم الأغلبية في توزيع الكراسي … تبي مستكة ؟

ــ هات مستكة كان خذيتها انت من البداية خيرلك وخيرلي .. ونقولك حاجه .. اعلق المارشا ياراجل وعدي خلينا نكملو مشوارنا حسّك ركبت فيا الوسواس ..

محمد بن سليم