مقالات مختارة محمد بن سليم : فك المارشا (3)

من طرف **dude333** 2012-05-01, 8:29 pm

مقالات مختارة
محمد بن سليم : فك المارشا (3)
1 مايو 2012
فِك المارشا مجموعة من الخواطر تحكي عن الهموم الحالية للمواطن الليبي بطريقة ( هم يضحّك وهم يبكّي) ، ومعلش يسامحونا جماعة اللغة العربية لأن (فِك المارشا) ح تكون بالعامية لأنها زي الهدرزة بين اي اثنين ليبيين …
يومتها كنا متجمعين في جلسة تعارف بين طلبة القانون .. ما بين اللي يقرى ماجستير واللي يقرى دكتوراة .. وطبعا نهدرزو عل الوضع في ليبيا وشن صار وشن ممكن يصير وشن دور الطلبة اللي يقرو بره ليبيا ، خير ما هما شاغلين أرواحهم 24 ساعة بالقرايه وكل واحد يقول لروحا “خليني نقرى لعند ما يصلّح حال البلاد وبعدها نروّح” .. وعجبتني كلمة واحد من الجماعة ونحن نهدرزو .. طالب دكتوراة في القانون من مصراتة.. قال توا اللي طالعين فيها هما أشباه الثوريين .. ركز هاه أشباه الثوريين مش أشباه الثوار ..
هذوما اللي كانو يبو يموتو بيش يثبتو حبهم وعشقهم لمعمر وللخليفة القادم ولده سيف .. بس ياخسارة ما كلوش كسره مع الروس الكبار في اللجان الثورية وبعدها راح فيها معمر وراح فيها سيف .. شن يديرو توا؟.. جتهم الفرصة توا .. وقعدت نفكر بيني وبين روحي .. صاح والله شن يبي يمنعهم جماعة أشباه الثوريين؟ خدمو مع معمر؟ ماهو يقولك كلها خدمت مع معمر .. إذا كان رئيس المجلس الانتقالي (أمين) سابق وفيه من سفراء لليبيا حول العالم كانوا (أمناء) في عهد القذافي .. ماتستغرب شي توا ياصاحبي .. أشباه الثوريين عندهم المزايا الصح بيش يصدّرو المشهد السياسي في الوقت الحالي .. وجوه صاحات .. لسان طويل .. قدرة عالية على تحمل الهزايب ومرات الضرب أخرى .. عادي مفش مشاكل .. المهم يطلعوا في التلفزيون ويلبسو بدلة وقرواطا وهات يانفخ على أهداف ثورة 17 فبراير المجيدة ولازم نديرو كذا ومش ضروري نديرو كذا .. باهي أنت شن قدمت للثورة لما كانت ضعيفة وكيف باديا؟ شي؟ كنك؟ ااااه قبضة أمنية وكانو مهددين هلك طبعا .. هذا عليش توا كيف لبست القرواطا ..
ما علينا .. على قد ماعجبني تحليل صاحبنا من مصراتة لجماعة (أشباه الثوريين) .. بس على قد ما زعلت على دور الطلبة الليبيين اللي قاعدين في كل مكان في العالم .. ومافش ولا نشاط ثقافي اجتماعي يجمع الطلبة مع بعضهم ويحكو ويتناقشو على وضع ليبيا وكيف يقدرو يساعدو وهما ـ اللي مفروض ـ الطبقة المثقفة المتعلمة واللي طالعا تكمل في دراساتها العليا .. مافش إلا فكرة وحده في العقول ..(خليني نكمل قرايتي بلكي من هنا لعند مانكمل يقعد وضع البلاد خير ومستقر) ياعمي كيف تبي تقعد البلاد مستقرة ويتحسن وضعها دوبينا فيه سلبية هكي من الطبقة المتعلمة ونحنا موخرين لاورا .. صاح نفكو المارشا .. بس مره مره .. خير ما نلقو أرواحنا فاكين المارشا على راس دردوحا وامسك ما جاك بعدها ..
محمد بن سليم