شتاوي منوعة

السلام عليكم مجموعة شتاوات منوعة واللي عنده يزيد عليهن

لا نفرح لا نقول الفرحة لين الغالي يشيل الطرحة
صوب جمعني نا وياه انشاء الله طول العمر معاه
خود عيوني وأنضر بيهن اعرف وين مكانك فيهن
أيِّس ياطامع في ريدي صندوق ومفتاحه في أيدي
قلبي فيه ثلاث وظايف غارق ومكبد ومرايف
نرجى وامرجى في الله يجيني الغالي نعيش معاه
يا العزيز تعالى أخطبها ملت من قولة صاحبها
كان شوي عليك أشواقي خود اللي من عمري باقي
موازيني في الصوب ثقال ان غاليت نغالي عقال
يامولاي نحبه رسمي غير أمتى يبدا من قسمي
ياربي نجيه غلايا فاشل مش امتاع قرايه 
يرجانا ويموت علينا كان الغالي نيته فينا
شايف منك حن وطيبه تاخد عمري مش غريبه
الله يسامحكم يالقدم بخونتكم زدتوني هم
حملنا يالقديم بلاك لقينا غيرك ونسيناك
ندير غلا ونعيش بلاه عليك أقسام الله الله
اللي فاتك ماتشقي بيه انتي من الأول صقع عليه
خبرنا ياعرق الحن الغالي مشغول مع من ؟
جد جديد فرض شخصيته نساني الاول ونسيته
الخاطر متضايق زعلان يريد يهاجر للسودان 
الخاطر من كثرة الكساد بيعدي كعابي لتشاد 
يفنى عمري ومانتجدى باتي علمني نتحدى
ديري ياهبله في بالك شور غلايا ماترمي حالك
قالوا لي الأولاف إعفينا قلت لهم مربوحه زينه
يا لو كان الواحد بيده يمشي ويجيب اللي يريده

علي المصحف حطية ايديا-------لانخونك لاتهون عليا