قصيدة الشيخ //الشاعرسعيد الرفادى

قصيدة الشيخ // لشاعرسعيد الرفادى

الشيخ هو اللي شايخ علي سياته ....... ولا يقرضا واحد بطول حياته
ايشوخ عيب السانه ................... ولا يقرضا واحد بطول زمانه
ولا يعيب ولا يفلت علي جيرانه ........ويحافظ علي العيله بكل ثباته

الشيخ هو اللي شايخ بزين اعماله ..............ومع كل واحد طيبات افعاله
وعارف الموت كل يوم تساله ........... وديما علي الجملة بخير وصاته
ولا يكون طاغي كان واجد ماله ........ ايخاف من الله حارص علي مرضاته
وعارف الدنيا كل يوم بحالة ...............كمين كافر بعد الفجور طواته
ليام بين الناس دالة بداله ................... وكل غصن ما يطلع الا بنواته
والراجل الزين ايكون واسع باله ........وعند الشدايد ما تشين الغاته
الناس السعادي هم اللي حماله ........... ايوارو العيب ويستروا عوراته
كان جيت قاصدهم صخا وجماله .......ابموجودهم ما يبخلوا ابعطاته
شريف اصلهم ماهم اللي كرداله ........ ولا يشكروا الظالم بطول عصاته
خايفين م الرحمن جل جلاله ............. شافقين من يوماً ايطول ضحاته
هضا الحق الواجب على الرجالة ............. اللي ما بناهم علي الخيا ساساته
وعدوك انباشر لا تصدق فاله ............ والجرح الردي يبرا علي شيناته
ديما بسوه كاربات احباله ..................حتي لو صفي مرة اتجي نبهاته
واللي تكرهه ومالك عليه دلالة ............ زرع المحبه في القلوب نباته
واللي حابك وعندك معاه وسيله ................ عقدة قوية ما لها نفلاته
اترايف عليه وبلخطا تمشيله .............. وان ساولك ما تنشد علي زلاته
قوة اصالة في قلوب تليلة ...............روح العلا ما عمرها خشاته
كيف الجبل صامت معا تدويله ......... وان جاه العدو تصعب عليه رقاته
هضا طبعهم لجواد في تفصيله ......... ويمشي معا الانسان طول حياته
ولا ينعدل مشيول فوق خويله ............ لازم اتبرطع وين ما حساته
واللي م العرب يكبر ايفوته جيله ......... يبقي كما الغريب بحكاياته
والدنيا علي مر الزمان طويلة .......... والتاريخ ما ينسي علي ماضياته
واللي فوق وزنك ما اطيق اتشيله ...... ولا من تمني شي طال امناته
وبوعقل ما يرضي افعال رزيله .......... حتي لو اضايق ما تضيق قناته
ولا الحر يبقي ع الغراب نزيله ......... ولا عمر حازة الليل دون امباته
ولجواد تندا ولا تكون نزيلة ............ فعل الصغار م الوجود نفاته
عزومها شداد وتشيلها الثقيلة ............ وانجاها الخايف ايطول حماته
و لا تنطقا بلغات قال وقيله .............. لنقل الحجايج عندها ابثباته
والزين هو اللي يلم اخطاء القبيله ....... وديمه افعال الخير هن عاداته

ليام بين الناس دالة بداله ................... وكل غصن ما يطلع الا بنواته
بارك الله فيك ولو اتزيدنا قائصدللشاعر سعيد اتكون درت فينا خير ومشكور اخي حبه مسك

ياحبة مسك.... اى (سعيد) فيهم ...اذا كان سعيد بوسعد....... معناها تعديت الحدود ومعنى هذا ان الكابتن وهو الناقل الرسمى والوحيد لهذا الشاعر سيرفع ضدك قضيه تعدى واختلاس...واذا كان واحد غيره يجب ان تاتى بالاسم ثلاثى حتى نتمكن من التعرف عليه...........مشكور على النقل العالى الجوده