قواعد المرور المتبعة في ليبيا

قـــــــــــــــــواعــــــــــــــــد المــــــــــــــرور

طبعا فيه قواعد مرور في وسط البلاد لازم كل واحد يعرفها :-

1- ماتخليش مسافة أمان بينك وبين السيارة اللي قدامك لعدة أسباب :

أ- حتجي سيارة تستغل الفراغ اللي أنت خليته وكل اللي كسبته أنك وخرت شوية

للخلف.

ب- أنت هكي تعطي فرصة للصغار باش يجروا قدام السيارة

جـ- كل المشاة حايغمضوا عيونهم ويقصوا من قدامك.

د - سواق السيارة اللي وراك حايسمعك شوية قصائد أدبية مش للضي.

وكان أيفيكو والله ماعنده مشكلة وخصوصا ذوي الشعارات ( أنبيعك علي خاطر ربع )

2- لو سيارتك عكاري (عقرب ريح) أنت ملك الطريق ما زيك حد والكل يديرلك ألف

حساب وطبعا حتمشي علي مبدأ الخنفورة ( اللي خايف على قربوعته يوسع )

(مبدأ الخنفورة ) : اللي يخش بخنفورة سيارته الأول هو صاحب الأولوية .

((ملحوظة)) ماتطبقش مبدأ الخنفورة مع تاكسيات الربع .

3--الفليتشات والقمبري وباقي الأشارات تكشف نواياك للأعداء لذلك ردبالك تستخدمها

كانا وقفك شرطي مرور وماعندكش علي شن تتكي حاول أحد الطرق التالية:

1-- فنص فيه وحاول تتسلح بشوية تكشيخات( جو أنا باور ) ورد بالك تستعمل كلمة

زميل ( زوى عليها الفيل يزبطوووك )
2- كانا باين عليه مش ولد بلاد حاول تجبد أصل شجرة العائلة بالك يطلع ولد سيد ولد

عم ولد جيران صاحبك .

3- كان مش واقف في الستفة الأولي قدام الأشارة بيب بشكل متواصل وأستفزازي (

كان هذا والله مامعبرك واحد )

4- حاول بقدر الأستطاعة أن تتجنب سيمافرو سيدي المصري ( المقبرة ) وسيمافرو

المنصورة ( أرض الموت)

-5 كان شلع السيمافرو أحمر خود قاعدة كلما قصيت أسرع كلما نقص أحتمال أنك

تخبط السيارة.

-6 ماتعدلش علي أي واحد يدير تجاوز لأن بعدين مش راح اتحز حتقعد تشوف فيهم

وماتلهاش في الطريق .

-7 ماتدرسش قدام المحلات لأن كل محل له ملكية السيمافرو اللي قدامه ويقدر ايدير

للسيارة أي حاجة ( يدفها في نص الطريق )

-8 أحترس من هذه النوعيات من السواقين:

أ- الشيابين بكافة أنواعهم ( مدي النظر متر لقدام )

ب-البناويت اللي كيف واخدين الرخصة نيو( لما تجي قدامهم سيارة فجأة أول حاجة

يديروها ايغمضوا عيونهم).

ج - الجماعة المتصندلة ( النوعية هذي والله ماتشوف في حاجة) .

د - سواقين التاكسي ربع ( عمرك ماتسوق وراهم يبيعوك بربع جنيه زي ماقلنا سابقا).

ملحوظة لو صار ما صار ماتحاولش تقنعهم انهم غالطين.