الدنيا عجيبه { روفه الدعبوب}

الدنيا عجيبة والغريب اتجيبه ــــــ واللّي فالقضا ربّك عليم ابغيبه.

الدنيا مَرَّة ـــــــــــــــــــــــــــــــــــــــــــــ تزّوّق وللّي جاهلين مَضرة

المومن امخلص في ضلال اتجرّه وهو كان في درب الهداه ايصيبه.

والعاصي يتعوذ من ابليس او شرّهـ وتاب ع المعاصي بعد دقّ صليبه.

الدنيا صابه ــــــــــــــــــــــــــــ والناس ع المعيشه كلّها تزّابه .

واحد ايلمّه زرعها بترابه ـــــــــــ اوّاحد ايهاب الحصد والتشويبه.

اونقّال زرع واطي ما ايردّ اتعابه ويوم ميرته تصبح عليه صعيبه.

الدنيا سوقه ـــــــــــــــــــــــــــــــ ساعه ابشدتَّا اوساعه روقه.

واللّي الها مطمان جاته بوقه ــــ شاف شي مو حاسب اولا يدريبه.

خلاته ايخمّم ضايقات اخلوقه ــــــ وراسه تبدّل ع السواد ابشيبه.

الدنيا عوجه ـــــــــــــــــــــ اتجيب للغني فقره والفقير الخوجه.

كيف البحر ينزل او يرقا موجه ـــــــ ريته مثيل الوقت في تقليبه.

واللّي زرع غيره جنا منتوجه ـــ واللّي افرح بادَّين جاه طليبه.

الدنيا عجيبه والغريب اتجيبه ـواللّى فالقضا ربّك عليم ابغيبه