سبع صبايا في قصبايا انلود انلود ونأكلهم ..

من طرف **زهرة اللوتس** 2012-03-04, 12:41 pm

سبع صبايا في قصبايا انلود انلود ونأكلهم ..

قالك في راجل عنده سبع صبايا امهم ميتة وكان هو بوهم وهو امهم وكان هو يموت عليهم .جا وقت الحج شوق وحب يقصد ربي ويمشي يزمزم قال "شن اندير ؟نخلي هال سبع صبايا وحدهن وبره".شرالهن اللي يسدهن عام كامل ما يقول الفم واللسان :زيت سميد ,كسكسي ,سكر, ووصى عليهن كليب كان عنده.وصاهم ما يحلوا باب الحوش لحتى حد وجدر عليهم الباب ومشى على روحه.سمع الغول بها السبع صبايا بروحهن وحب ياكلهن في الليل شد ثنية دارهم ومشالهم فرحان وهو يغني ويقول :"سبع صبايا في قصبايا انلود انلود ونأكلهم ".واذا بهذك الكلب يجاوبه:"سيدي وصاني عليهم والله ما تذوقهم ".هرب يجري خايف من الكلب يبكي ويقول:"يا شلالي على ركبي يا نبيح الكلب علي".من الصبح لبس حايك وتنكر ودار روحه خالتهم .جاب معاه قصعة عصيدة ومشالهم .دق الباب عليهم ما باوش يحلوله .بدا يلحلح ويقول :"يا ناري انا خالتكم ليش تقعدو بروحكن .عيب تردو علي.بوكم صعيب حبيت نجي البارح نبات بحذاكم نونسكم ياخي الكلب بهز علي وقطع لي حايكي الجديد قالولها :"باش ترجع تبات بحذانا تونسنا" شرطت عليهم يرتاحو من الكلب متاعهم .قالولها:"باهي" .لكن الصغيرة فيهم بدات تقوللهم "ردوا بالكم ما هياش خالتنا ما عندناش خالة عمرنا ما سمعنا بيها".ما سمعوش كلامها وضربوها وقرصوها .وفي الليل داروا على الكلب ذبحوه ورموه في الشارع واستنو خالتهم.
والغول من جيهته خرج وبدا يقول :"سبع صبايا في قصبايا انلود انلود ونأكلهم".والكليب الميت الملوح في الشارع تحرك وجاوبه:"سيدي وصاني عليهم والله ما تذوقهم" هرب الغول يجري ويقول :"يا شلالي على ركبي يا نبيح الكلب علي".من الصباح رجع لهذكنه الصباية وقال :"لازم تحرقو الكلب" حرقوه لكن البنية دست وذنيه وفي الليل هو جايهم ويقول كيف العادة :"سبع صبايا في قصبايا انلود انلود ونأكلهم" وصوت طلع من هذك الرماد يقول :"سيدي وصاني عليهم والله ما تذوقهم".هرب الغول يعيط ويقول :"يا شلالي على ركبي يا نبيح الكلب علي".ورجعلهم من غدوة الصباح وطلبهم يرمو الرماد في البير .لكن ديمة كل ليلة الصوت يجاوبه من البير :"سيدي وصاني عليهم والله ما تذوقهم".رجع البو من الحج دخل فرحوا بيه نشدهم على الكليب قاتلو البنية الصغيرة وحكاتلو الحكاية متاع خالتهم فهم القصة وقاللهم :"ما عندكمش خالة هذا غول توة نوريكم فيه".وفي الحين مشى حفر حفرة زرداب كبير قدام الدار وعباه بالنار وغطاه بحصيرة ورد عليها التراب باش ما تظهرش .الليل طاح والغول جا كالعادة يعيط :"سبع صبايا في قصبايا انلود انلود ونأكلهم" الكلب ما نبحش نقز على الباب يكسره وتعدى على الزرداب طاح مات .وهكي الكليب ولو مات نجى السبعة صبايا .قصص التراث الليبي