يامابكت يومتا واللي مااجرح يضحك علي بكيتا العين م الخطا

من طرف **العاشق الصغير** 2012-07-05, 11:12 pm

يـا مــا بـكـت يومـتّـا...واللى ما اجرح يضحك على بكيتّا ...الــــعــــيــــن م الــــخــــطـــــا

يـــا مــــا نــقــت...نين كبدها يوم الفـراق انشقـت
العين عزمها واجدعليهـم رقـت...فى لرض فى كبد السمـاء عيطتّـا
لو كان فيدها دون الفراق اتقـت...لكن الدنيـا هـذى هـى دوتـّا
ايزول كل من جابت العين وحقت...حوايـج الدنيـا ع الخيـا بنيتّـا
وما من اقوام بخيـر فيهـا بقـت...توارت وخلت ع الوطـا بصمتّـا
وما الناس ماكل التمانـي طقـت...دنيا قسامـى مـى علـى غايتّـا
كيف لرض رويت بالسحاب اسقت...تيقـه وتيقـه يابسـا احطبـتّـا
وكمين دار ياعين كي استحقـت...حتـى وفيهـا دوج يـا خلوتّـا

بــكـــت بــدمـــوع...ويا ما على لـولاف دارت نـوع
ويا ما رجت غير الرجـا مقطـوع...العين ف الغوالـى طايلـه عازتّـا
ابكاها ايوالـي غيـر ف الملـذوع...اللى كيفهم باكـى امعـا لذعتّـا
واللي لااجرح عمره ولاممصـوع...وفى ما احذا عينـه القـى غفوتّـا
اللي ما ايفرق بين كـوع وبـوع...ويعرف الصبح امغير مـن زرقتّـا
هيا لابكاهـا ع العزيـز ابـروع...وهي بل احجر لوعة عزيـز كلتّـا

يـا مــا بـكـت يومـتّـا...واللى ما اجرح يضحك على بكيتّا ...الــــعــــيــــن م الــــخــــطـــــا
الشاعر محمد عبدالرسول البزاري