وجّاع قول الحق

وجّاع قول الحق

وجّاع قول الحق في ها العالم
اتشوف العوج بالضيم فيك ايساوم
----
شوف بعينك
واسكت على اللي ايصير..عد سنينك
وانكان تبّي تعيش..خون ايمينك
ما سمعت ولا ريت العوج من ظالم
وجّاع قول الحق في ها العالم ...
---
اشبح كيف
صاير في دنيا..تنحكم بالسيف
قاضي وحكم ومدّعي..قانون دولي منختم بالزيف
ويضيع العمر في كلام خايب عايم
وجّاع قول الحق في ها العالم ..
---
بكي الانسان
وين شاف المذلة بعينه..وعاش في حرمان
العدل انظلم..ضاع الأمن في مجلس الغيلان
وتاه البشر في درب ماهو سالم
وجّاع قول الحق في ها العالم
اتشوف العوج بالضيم فيك ايساوم
---
تحب تفهم
تحتار لين تدوخ..ومانك تشتم
تحلم بزرع الخير..من قالك ما تحلم
لكن في سرك..خوذ النصيحة خيرلك يا بنادم
وجّاع قول الحق في ها العالم
اتشوف العوج بالضيم فيك ايساوم