ما عاد نبي شي ... شعر : حنان عبدالكريم

من طرف ارفادية حرة 2013-05-24, 2:40 am

ما عاد نبي شي
من يوما غلاكم مات بين ايدي
مالدنيا هذي
ما عاد شي نريده
و لا تنكتب ليلة انبات سعيدة
بعد فقدتي الصوبك نعيش شريدة
الموت ارحم من رقاد هني
نودع غلاك و دنيتي الرغيدةِ
ورا مركبي بالله عليك امشي
زكي علي روحي ادموع بديده
يوم دفنتي ابكي علي شوي
إذكر القانا و احتفل في عيده
كل عام اقرا مالكتاب علي
ما عاد نبي صوب
و لا عاد نبي مالحياة مكتوب
يغفر الله اندرت في اذنوب
فيده ايسامح كان اذنب حي
و فيده ايبري مالمرض مكلوب
و فيده ايخلي حالته هي هي
و فيده ايقرب فالغلا محبوب
و فيده إيباعد و القسام اتجي
انكاني اذنبت هو اللي مطلوب
يعفر أذنوبي ابعطاه السخي
ما عاد نبي فرح
و لا عاد نبي من يداوي الجرح
ياسك و موحك فايتات الشرح
اللي يريد يفهمهن ايجيني جي
افراق وعذاب اليوم دارن شرخ
ما ينفع معاهن غير نكوي كي
الله والنبي راني نريد الصفح
ارحم دموع العين روف علي