الرفيق للشاعر: جمعه بواخبينه

من طرف فرج جا بالله 2017-10-06, 8:05 pm

اللي ترافقه تعرف جميع أفعاله .. وطولة الطريق اتبين الرجاله
إسال امجرب .. اللي لبها من شرقها لمغرب
هناك ناس طرواهم صحيح ايطرب .. كيف الطعام اللي لذيذ اوكاله
وهناك ناس ماودك الها تتقرب .. وحتي هم قبال العين في ماياله
عدوك تقلع شورهم واسرب .. رحيله وماعالم اللي تطراله
كيف من بلوح انخال بات امزرب .. ليلة شتاء وبروقها تشاله
تعرف نوعه .. يا من تتركه والا تجي في طوعه
والصاحب اللي لنصايحك مايوعه .. وتقدر اتجيبه للطريق قباله
بلاه خير والصحبه اللي طبوعه .. اتسبب مشاكل مالها حلاله
وبالعيب كان واخذته وهو قربوعه .. تبقا انت انهبلت كيف اهباله
ورا الصبر ماكيفه دوا للوعه .. حتي ان كان مر قليل من ياباله
كلها من طين .. خلقها الله وداراها جزئين
فيهم اللي ماينغرو عفنين .. الواحد يبوبح كان دار فساله
ويبقى بها فاخر علي الاخرين .. كي من قتل بوه وقتل قتاله
ولا له عرق يقطر مع عرنين .. ولا يندقر ولا تصير له نخجاله
وان كان طاوعوه بصيفته والدين .. عليها ايدرب من جديد عياله
نين يارثوها ريت هالخزين .. اللي عقبا بوهم بعد مرحاله
وفيهم اللي زينين حد الزين .. ماهم لدور الخاطيه قباله
من غير قادر سته سوا ستين .. الواحد ايجي للحمل يدناله
وينوض ناسفه مهما يكون رزين .. مايقول قول ويتركه من باله
كيف ماردي الافعال بو وجهين .. يلفظ معاك وهو من الحايله
ويدير الخطا والكاينه بعدين .. ايجيك يتعذر فيت ماتصغاله
كيف مايسيبها وهي بالعبن .. وناوي يقص دروبها هياله
اسأل امجرب من مدد وسنين .. صاحب ورافق والرفق وراله
مو الفرق بين اثنين معنين .. واللي مو مجرب نا اللي نفتاله
ولا ينطرو موته مع حيين .. ولا توتكل من الحي فيت عماله
ان زلت انريد .. انوضح ونشرح بيت هالقصيد
اللي مايعزك مايكون سنيد .. حتي ان قلت صاحب خير لا ترجاله
يقولك معاك وهو عليك بعيد .. اوقات الشرق مشية شهر بهلاله
ومن الكيد وين تشكيله ايزيد كيد .. أبذال مايفكك من الوحل واوحاله
ولا يلحقه في الخاطيه تنقيد .. هي فرسه بنت فرسه هي مواله
ونا صيفتي شاعر القول انجيد .. ونوزن الدي ونعرفه باظلاله
ولاجيت متصلب عليه جديد .. ولايهمني تنكيل من النكاله
انقول في كلام الغافلين يفيد .. واللي تنصحه من ثواب تناله
رافق ظنا الاجواد الاجاويد .. وجوه الفرج وقتا اتضيق الحاله
لاترافق اللي مايجو في اليد .. وان كان لمتم يبقو عليك زعاله

من طرف عبدالله الشندي 2017-10-07, 1:03 am

انعم انعم احسنت

الرفيق للشاعر: جمعه بواخبينه

الرفيق للشاعر: جمعه بواخبينه

رد: الرفيق للشاعر: جمعه بواخبينه