سامر الليل أبطوله.قصيدة للشاعر.ناصر بوأعجيلة الشيخي

سامر الليل أبطوله.قصيدة للشاعر.ناصر بوأعجيلة الشيخي
***
سامر الليل أبطوله.. أعزاز خاطري فاهق خلاء خلّولَه
أمعاه مارقد .
***
شكى العقل من جرح وجّاع ..... مابا إيبطّل سطيره

حايس وناصب أنواع ..... أمعاه ماتريّح ضميره

وديمـا على الغوش قدّاع ..... أتـقول فيه عنده طمِيره

شاغلات باله وملتاع ..... أوهام قبل كانت شهيره

فيهن أسماح الطباع ..... فكـاكة الكربة الكبيره

بنّاية البيوت الوساع ..... ركّابين منقوش ديره

ربّاية لِيتام الجّيَاع ..... ع الجّار يقسموا فالظهيره

وهل بنت وافية أقناع ..... أعيونها كما أعيون طيره

وهل صغير ماهوش طمّاع ..... وعنده على الاسم غيره

أن صارن تجاريد وأفزاع ..... وزام طبلها فى نـفيره

لو مهَر لاهو ربَــــــــــاع ..... أركوبـته ولاهي جشيره

إيجي فوق مكروم صوصاع ..... أتقول سبع يربي هريره

إيعاود الّلي قبل ضــــــــــاع ..... والدم عاقد قطيره

وهل شيخ لاصار النزاع ..... ماينعقد فى بصيره

كبير عقل للدّي ردّاع ..... قليل وين تلقي نظيره

فعّال خير للشر منّاع ..... عليه لامِّين الـعشيره

راضيينه بالأجماع ..... ماحدّ إيريدوه غيره

واليوم كلّهاتمّت أرداع ..... والّلي هذا قال ناالخِيره

وخلوَة عرين السّبَاع ..... عدن أصيوداً حقيره

وهذا الدّهر ياالسمّاع ..... كل شي ساهل إيديره

مرّات صابات وأرجاع ..... ربيع طفش فوّح عطيره

ويـسيرن مطـامير وأقياع ..... ويحول فى المخازن شعيره

ومره جدَب شين هوزاع .... إيخلِّى العامره دميره

ولاكلّ برق شكـــــــــــاع ..... عاالارض يصبح غديره

أهناك برق ريح خــــــدّاع ..... ماعليه ترمي مطيره

والمولى خلقها أنواع ..... ولا العلو كيف العقيره

فيهم اللي مرّ ينتــــاع ..... وفيهم اللي كي القيره

وفيهم اللي سمح لمّــاع ..... من برّه ونيته شريره

وفيهم اللي أبطولَت الباع ..... ذاكرينه بالشّكيره

ويالـعقل كون مُطاع ..... وعاود عليناالـشيره

وأصبر وكون شجاع...وأطلب المولى يبري أجروحاً نازفه محلوله

سامر الليل أبطوله.. أعزاز خاطري فاهق خلاء خلّولَه
أمعاه مارقد

رووووووووووووووووووعة يسلموووووو

مشكور يا غالى على ما طرحت بارك الله فيك