عادات وتقاليد...الفرح في الشرق

من طرف **STAR** 2010-06-30, 8:38 pm

الأسبوع قبل العرس حلويات وغيطة ما هنا بكل.. اكوش ولعات وطواجين ودرابيك مالجنب

أسبوع العرس

(طبعا من يوم)
السبت
يعلقوا الضوايا ع الحوش ويشربوا شاهي وكعك وديس فالشارع وسيارات زحمة

الأحد
مكسدين نفس الشي فالشارع وشاهي وكعك عالق لعند أخر يوم

تفريش الحوش كان عندة حوش او كان كارى حوش
العروس اقريب اتجيب حوش هلها كلا
كان مش 3 كناتر اشوي

1- الصالون والفرشة وتوابعة(دار المقعد)

2-دبش المطبخ كامل ناقص امغير تجيب الخضرة

3- حتى الحمام يجيبولا في فرش وتحف ودواليب شوفوا جوكم

الاثنين
مرات عندهم حنة جو غيطة وسيارات يبوا يمشوا لهل العروس طبعا العروس ملفوفة في جرد في عز الصيف والعة فيها نار وعلى حسب لون الجرد مرات احمر ومرات بودري

ايشوفوا هل العروس ويروحوا طبعا غيطة غادي
هل العروس يغنوا
(يا مبروك عليك الحنة درتي حوش اتجينا منه)
والعزايز واخدات تركينة وعلم قالب الدنيا ما عاد ايكملن بكل

بعدها يروحوا بيب بيب

الثلاثاء
(السياق)
اينوضوا بدري يا فتاح يا عليم م الساعة سبعة شور سوق الخضرة ايجيبوا الخضرة ومعدات التنظيف مالأخير كان عريس امورق ايجيب السوق كله وكان راقد ريح الله غالب عليه ايجيب ربطة كسبر وربطة معدنوس وسياقة في سيارة ومكنسة فالسيارة الأخرى
وطشة بصل وكيلوين طماطم ايتفتف من هنا ومن هنا

يملوهن كلهن فالسيارات امعاهن عرم عزايز عالجو مرات عزوزين ثلاثة
أنسيت حاجة مهمة امعا هذا كله حوالة قاعدات في سيارة بروحن طبعا

يمشوا بيهن شور العروس ينزلن العزايز ويبدن فيها
العزوز الأولى
(عمري ما بركت أجمالي غير ع اللي قدره عالي)
وراها العزوز الأخرى
(مش ساهل تبريك جملنا غير على اللي يستاهلنا)
واتنوض من غادي العزوز الأخرى
(يا مبروك عليه جهازه واخد من عيلة ممتازة)

المهم يقعدن ايمنن عليهم بالجمل ويفوتوا العريس ما يغنوا عليه بكل اتقول اللي متجوز جمل

طبعا أكيد هل العروس دايرين فطور لهل العريس

لكن على حسب كان هل العروس عندهم ذوق ايديروا حاجة كويسة طبيخة (قلايا) (كبدة وجو)ع الصبح

وكان عاد هم من يالا ايديروا اشوية تن وحلوة طحينية مع إنهن مش شور بعضهن بكل
يسمطوها فطور هل العريس سمطتة اقلال الوالى ويروحوا

بيب بيب بيب

الأربعاء
(الرمي) اللي هوا يمشوا ايشيلوا الكسوة للعروس وحنة ودنيا حايسة

طبعا العروس لابسة فيلو فالكوشة
وناس جاية للعرس
بعد اشوية ايجوا هل العريس بيب بيب بيب

ايشوفوا العروس وايروحوا واتحنيها أم العريس

اتنوض عزوز مالجنب اتقول
(هالعزوز اللي حناتك حطيها بين اعويناتك)

ايلبسوا العروس العقد وايغنوا احذاها اشوية ومرات في طحنة بين هل العريس والعروس فالغنا

بعدها ايروحوا هل العريس

الخميس
اليوم العالمي عند هل العريس شوادر وعشاء رجالة وشاهي

وطاولات في مسرح الصبايا وكوشة

ايجوا المعازيم بعد المغرب للعرس واتجي العروس

ومرات يخش العريس وايجيبوله تورتة ياكل هو والعروس
معا خشة العريس ايغنوا مالجنب ايقولوا
(ماشاء الله عليك عريس اتقول فرنسي من باريس)

ما اتعدلوش عليها واجد الأغنية أصلا مرات العريس يفجع وهم ايشوفوا فيه سمح!!
وأغنية وحدة أخرى
(بارك للسلطان تهنى جابوله نقراش الحنة)
بعد قعمز العريس وياكل التورتة هو وعروسته

اتنوض عزوز مالجنب اتقول
(واسطة يا واسطة واحد ياكل واحد لا)

بعدها العريس ياخد عروسته شور حوشم

بعدها ايروحوا الناس كلهم

الجمعة
يعني يوم الجمعة أسبوع عند هل العريس
دايرين العشاء كسكسوا ومشروب وامصير ومخلل وبوريك ومبطن ....الخ

تلبس العروس عربي (محزمة)

وامعاه ذهب من فوق لتحت عقد ونبيلة ...الخ

تقعمز فالمسرح والعريس بره معا الرجالة لابس عربي

جلابية وكاط (سورية زبدة)

وامقمعز في الخيمة معا أصحابه وأحبابه

بعدها ايجوا هل العروس ايجيبوا حلويات وموالح ايوزعوهن ع الناس وبعدها أيفض العرس وكل واحد في حاله
وكان العروس عندها ذوق أتجيب حاجة كويسة لخوات الراجل وأمه وكان من يالا أتجيب ساعات أي حاجة!!

وفى الاخير وبعد العرس ايجى يحسب العريس فى تكلفة الفرح يلقاة على حسب مرات 14 الف مرات 11 الف على حسب كان فى ماء الكفرة فى الفرح او ما فية كان فية موز او مافية ويستغرب كيف الفرح كلف 12 الف ونا ما عندى حتى 5 دينار ويمشى الفرح عادى جداً وكان عطاة الله عمر اشوى ويجوة العويل ويبدا فية المودس وحليب الحكة معش ايدير سيور على حالة بلكل

من طرف ابن المنتدى 2010-07-06, 10:47 am

شكر على الاخبار الليبية البحت

من طرف محمد اللافي 2010-07-06, 11:27 am

صدق الي قال عرس
الزبده قلبه وهرجه وبرام ملا برام

مشكور ستار علي القصه الرعب بارك الله فيك

من طرف المارد الأصفر 2010-07-06, 12:29 pm

نعم ويستمر العرس بعد انتهائه وتبدأ المعاناه وندب الحظ والمشاكل هذا اذا استمرت الحياه الزوجيه بعد أن يفوق من أحلامه وسباته العميق فربما يرى العريس انه الأجدى به ان يفك هذه الشراكه بعد ان يصطدم بالواقع وينفذ بجلده وكأنك يابوزيد ماغزيت دمت لنا أخي الفاضل موضوع رائع يحاكي الواقع الذي يجب النظر في كثير من مفرداته حتى نسعد بحياة أفضل

من طرف جلنار 2010-07-06, 1:22 pm

هههههههههههههههه موضوع من الاخر

تفريش الحوش كان عندة حوش او كان كارى حوش
العروس اقريب اتجيب حوش هلها كلا
كان مش 3 كناتر اشوي

1- الصالون والفرشة وتوابعة(دار المقعد)

2-دبش المطبخ كامل ناقص امغير تجيب الخضرة

3- حتى الحمام يجيبولا في فرش وتحف ودواليب شوفوا جوكم

اللة غالب عليها كان ماجابت شي يحطنها عالمشرحة
مشكور تقبل مروري

من طرف **STAR** 2010-07-07, 9:58 am

الله لا ايغيبكم يا غوالى اجعنا ما نفقدوكم يا بركة المنتدى

من طرف pure heart 2012-02-25, 10:37 pm

هههههههههههههههه مشكور يا ستار والله أكثر موضوع يضحكني في المنتدى

(ماشاء الله عليك عريس اتقول فرنسي من باريس)

ما اتعدلوش عليها واجد الأغنية أصلا مرات العريس يفجع وهم ايشوفوا فيه سمح!! عادات وتقاليد...الفرح في الشرق 759152