خارج نطاق التغطيه ياساده

من طرف بوالفرايس 2009-05-16, 9:14 am

خارج نطاق التغطيه ياساده ....... عزيز سابني ما رن في ميعاده

وصلني راس بيت وعجبني وشاركت فيه وقلت معاه:

خارج نطاق التغطيه ياساده ....... عزيز سابني ما رن في ميعاده

انراجي فرنه .... اوهو خارج نطاق التغطيه يستنا .... وانا عزيز انقول زعمك كنا .... شورا جفاني وفي الغلا يتفاده

والله نفد الشحن طافي منه ..... لاكن غريبه ماي عندا عاده
ولا دز رساله ولا طمنه ..... شن هو السبب في غيبتا وبعاده
بالك عزيز ايكون زاعل منه ..... قاصد ايجرب حبنا ياساده
وني انقوله بلله ياعزيز تهنه ..... مازال عيني فبعدكم نشاده

تباعد شوره ..... ويش السبب فغياب سمح الصورة ..... اللي قبل علي الموعد اتجي مجبوره ..... اللي قبل ديمه نارها وقاده

اللي قبل دابلها الشوق وجوره.....اللي قبل ديمه فصوتها السعاده
اللي قبل مضحكها ايبان سروره ..... اللي قبل نيتها نضيف صاده
اليوم غيبت عيني بدت مقهوره ..... علي غيبتا اتلاجي كحيل هماده
بالك اخطوط التغطيه مكسوره ...... ولا انتينه طاحت عليك بلاده
طاحت ولت ع الوطا منتوره ....... وخلت اقلوب العاشقين نكاده
الله ايسامحك فينا عملتي دوره ...... وانشالله تولي التغطيه كالعاده

خارج نطاق التغطيه ياساده ....... عزيز سابني ما رن في ميعاده

من اشعار........اسامه المقرحي