الشهيبي..طالن ايام الغيبة..

من طرف المعبدي 2011-12-10, 11:22 am

السلام عليكم ورحمه الله وبركاته

طالن أيام الغيبه

وهي قصيدة للشاعر الكبير والقدير المرحوم

(أدريس الشهيبي)

غفر ألله له ورحمه

القصيدة

ياناسيه طالن أيام الغيبه**عليك هنت والاّ من أظروف صعيبه؟

****

طالن ايام الفرقه**ونارك مع وسط الستاير ترقا

وياما أحملنا من ليالي زرقه**والعين شاقيه بغلاك وأتهاتيبه

وكي غلاك ماغليوا عرب فى "برقه" **سواء من علَم والاّعريب عطيبه

نحنا موش لقـّاقة ظلام وسرقه**نحنا صوبنا كل العرب تحكيبه

شيّالة الطايح فى نهار الشرقه**نهار كلّ حد هارب لغير الصيبه

أصحاب عهد وافي موش كذب ودرقه**أنواع الكلام أنفصّلوا ترتيبه

قطعتي غلاء دوبه تمكّن عرقه**حلّفتك إيمين وبالنبي تشقيبه

وأنعدّوه كي مسحة شراب العرقه**أنتي تتركيه ونا عليّ أنسيبه

ونوطا على عقلي ونار الحرقه**صبّار خاطري نقدر عليه أنجيبه

والمولى خلقها كل حدّ له طرقه**أمفصّل الدنيا فى أطوار غريبه.

****

طالن أيام أغيابك**يالخايله ياللي لذيذ وجَابك

وياللي إيلجّن بالسواك أنيابك**وجَابك دواء كيف العسل فى طيبه

وياللي جبينك برق نوّه حابك**ذكّارة أشتاء مزنه هذَل تسكيبه

وياللي أتخيلي فى أصناف أثيابك**مع كل موضه فالبلاد عجيبه

وياللي أسماح أمدوّرات أكعابك**رشاقه وعدلَة ساق وأتهنديبه

وياللي أهدوبك نبتهن متشابك**أطوال فوق م الحاجب لهن تعكيبه

وياللي سهاريّك وروق شبابك**إيحيدن دراه الكبد والتضبيبه

وياطول ماتقنا عليك أحبابك**وأتجي أملاقيَه كيف الودود حبيبه

واتنطِّي ثمان أدروج فى مهلابك**سطّار جري لافيها حرج لاغيبه

وياطول ماتمّالنا مشرابك**سبيل غير ماردنا أمعاك عطيبه

انقحّز وندنىَ للبعيد أنهابك**حياء من عواقب شيّ ماتدريبه

وبلاوعي صارحتي جميع أحبابك**وقلتي اللي مض ماتدويبه

وتحسابي الدنيا من أعطاب أخيابك**أتسير فى نظاف وهي ظلام وريبه

وأنتي تربحي وأنا شطبت أحسابك**غباوين يامول العيون رغيبه

****

طالن ايام جضارك**لهن زمان ماطافن علي أخبارك

ياللي غلاك مع الزمان أمشارك**سرّاقه أتسير لخاطري تمشيبه

أغلطتي وقلتي للبنات أسرارك**وهن بدورهن جرّن عليك مصيبه

وعادة العرب فوق القعود البارك**إيزيدوا مع ثقل الحمول صليبه

واللي تقربه رايف عليه أجوارك**قدّامك حبيب ومن وراك دبيبه

وفتـّالة أحبال السوّ من خطـّارك**مايصدّقوا يلقوا عليك غبيبه

موش غير فى حبك ونوع أجرارك**برنامج العرب نكره أنجيب سريبه

باالله ننصحك ديما أيـّاك حذارك**اللي مو علَم تنسيب ماتشقيبه

إيجن أوقات تنخدعي أتبان عوَارك**واذيول العرب إيغرّوك بالتلعيبه

ياللي توارى فى النظاف أسوارك**لاقداك فى خدعه ولاتوكيبه

حلال قسمتك للي أمشيّط نارك**أنتي له مراد وهو اللي تزهيبه

****

تحياتي لكم

من طرف القديسة 2011-12-10, 3:05 pm

تبتعد
تجر خطوات
الرحيل
فوق مذبحة الهجر
اللعينة
تستل خنجر
الفراق
تغرس الدموع
بمقلتي
كنبتة العليق
الأزلية
تسترسل
في دمي
كالموت الأسود
تزرع الشقاء
تحصد الفرح
تأخذ الوفاء
تعطي الغدر
هكذا هي ايامنا
فلا تحزن عليها

من طرف القديسة 2011-12-10, 3:20 pm

احسنت الاختيار
فاختيارك موفق

من طرف **زهرة اللوتس** 2011-12-11, 5:57 pm

مشكور...صحيت على الكلام الرائع..وسلمتوووووووه..وفقكم الله

من طرف المعبدي 2011-12-13, 7:00 pm

شكرا لكما على المرور...

من طرف نسمة حب 2011-12-14, 9:10 am

شكرا بارك الله فيك على قصيدة عمى

من طرف **العاشق الصغير** 2011-12-14, 6:35 pm

مشكــــــــــــــــــــــــور وبارك الله فيك

من طرف ادريس امراجع 2011-12-15, 9:54 am

بارك الله فيك أخي الكريم على تقديم هذا الكنز الثمين

ونأمل منك أتحافنا بالمزيد من شعر الراحل ادريس الشهيبي
لان هذا الشاعر كان معتم عليه في عهد الطاغية،،،،،،،،،،،،،،،
ونكرر شكري وتقديري وسلمت..........

من طرف المعبدي 2011-12-16, 9:41 pm

شكرا ع المرور ونعدكم بالمزيد

الشهيبي..طالن ايام الغيبة..

الشهيبي..طالن ايام الغيبة..

رد: الشهيبي..طالن ايام الغيبة..

رد: الشهيبي..طالن ايام الغيبة..

رد: الشهيبي..طالن ايام الغيبة..

رد: الشهيبي..طالن ايام الغيبة..

رد: الشهيبي..طالن ايام الغيبة..

رد: الشهيبي..طالن ايام الغيبة..

رد: الشهيبي..طالن ايام الغيبة..

رد: الشهيبي..طالن ايام الغيبة..