ياصاحبي صبرك على بلواك

من طرف اسماعيل ادريس 2011-12-10, 5:54 pm

ياصاحبي صبرك على بلواك
وكيف الجبل خليك مهما يصير
لاتلوم حظك كان يوم خطاك
لاتقول عنه فى الحياه تعثير
واللي كاينه لازم تصير معاك
تكون بالمقدر مالها تغير
واللي تصيبك را من مولاك
ليك دارها والسبب قبل يدير
سوا تكون فرحه ساكنه جواك
سوا العكس نكبه مقطره تقطير
وليام كيف الريح مايغباك
نجت بالزها تاخذ الثمن كبير
فشباك خليها تخز وراك
وانت علي فاهم بلا تفسير
وخلي عالدرب الصلاح خطاك
على قد ماتقدر بلا تقصير
وخليك كيف ماخالقك مولاك
رفيع نفس عن نفسك انت مدير
وخلي الصفا والصدق في مسعاك
وخدم على روحك تفاءل خير
وخليك راجل حر عالمبداك
لاتغيره بمسرب يجيك عسير
مهما عليك يصير في دنياك
خليك بصلك دوم ليك ضمير
لاترافق اللي عفن مايسواك
اللي العرف عنده صفر بالتقدير
راه رفقته ماتجر غير شقاك
وتختم عليك ختام بالتدمير
واللي موبندك مايصح يدناك
خصك اللي لوجاك شوم نذير
لاجل انه فى العاقبه يجفاك
ويترك مواجع فى الجوا وسطير
ولاتدير من ليام يوم غطاك
راهي مثيل الريح فى التدوير
ولاتدير في بالك تجي برضاك
انكست تعري مالها تعبير
واركن بعيد الياس كان غزاك
اللي جرته كلها عذاب مرير
وارجى الفرج بعد الكرب ياتاك
ماحال باقي شر ولى خير
وهذا كلامي وانت دير وتاك
اللي تزرعه تجنيه في لاخير