يوميات :الحاج بلقاسم..و رئيس المنتخب الانتقالي!!

من طرف **زهرة اللوتس** 2012-01-11, 7:29 pm

قاسم: آه يا راسي !!!! الشكوة لله،،، راسي يوجع فيا يا حاج!! كان عندك حد إيسبب قوللي.
الحاج بلقاسم: عليك وعلى الشيخ جليّل ايديرلك خطين يحطوك سفير فى الارجنتين على طوووول.
قاسم: سفير وارجنتين وخطين!! هو أني مش قادر انعيش في بلادي تبيني نمشي للارجنتييين !!!!
الحاج بلقاسم: غادي يا خوي في الارجنتين الضي والميه مايهربوش.. ومرة مرة اتشوف عمك ماردونة.
قاسم: هو هذا مارادونا رئيس المجلس الانتقالي عندهم!!!
الحاج بلقاسم: لا هذا رئيس المنتخب الانتقالي!! تي يا دعوة ملاعبي كورة مشهووووور!!!
قاسم: يعني رئيس مجلس انتقالي كانه حق ملاعبي كورة لازم أيكون رئيس مجلس.. تعرف يا حاج شكلك دخلتها في راسي، هو جامد من هالسميطري لكن شكله بدا يخدم ، باهي شوفنا ياحاج كيف نوصلوا في الشيخ جليّل.
الحاج بلقاسم: اليوم لا... هو مشغول مع حسن البشير رئيس السودان بارك الله فيه الراجل دعمنا بالسلاح ايام الثورة وجاي اليوم ايباركنا بالانتصار.
قاسم: ع فكرة هي الارجنتين هااادي وين من السودان؟
الحاج بلقاسم: شني ... كيف!! ههههه هادي تقع في جنوب السودان في القطب المتجمد الشمالي!!
قاسم: لا لا يا حاج كلم اجليل ايشوفلي بلاد دافية شوية.. أني ما نحبش الصقع يا حاج..
الحاج بلقاسم: باهي شن رايك في ألاسكا!!
قاسم: هادي شكلها باهية لو مش صقع نمشيلها سفير انمثل ليبيا أحسن تمثيل،، خوك فالح زمان كنا انمثلوا في المسرح المدرسي أيه ياحسرة.
الحاج بلقاسم: تي تنوض تحسابها زي زمان واسطة نوض صقع عليك تمثيل ليبيا، على فكرة وين قاري..
قاسم: وين قاري ؟؟؟، تي كيف ياحج !! عندي دكتوراه في النظام الجماهيري.
الحاج بلقاسم: آه شينك تمثيل!!!!! وشن درنالهم يا حبيبتي.
عن:جمهورية شن درنالهم يا حبيبتي.