حكاية أمراجع أونرمين

من طرف **عبدالحفيظ عوض ربيع** 2009-08-20, 9:53 am

ناوين وأنتي ويـــــن ......... ماجاء الحاجب يوم تحت العيـــــن

أرجوك أفهمي ناوين وأنتي ويـــــن

شن حقيتـــــي .......... أنتي أمدلعة والعز فيه أربيتـــــي

أونا شين طبعي أوفيه شن حبيتـــــي ......... أوفالعمر واجد بينا لسنيـــــن

نا أبدوي دوم أمكرمشه سوريتـــــي ......... وأنقول شرق موش عالليميـــــن

سريبي طويل أمغير ما حليتـــــي ......... أيش جيب أمراجع لك يا نرميـــــن

أنتي خجولة والشقا ما ريتـــــي .......... أوديما اللحياتك دايره روتيـــــن

ما فطرتك فالصبح يوم أنسيتـــــي .......... اوكل نوع ماللوكال لاه أسميـــــن

وأمقمعزة أفكرسي عليه خذيتـــــي .......... أوكل نوع منا تاكلي فميـــــن

أولجامعة أبهنداي كنك جيتـــــي .......... أتقولي خذا الماتيز عزالديـــــن

أوعمرك شعر الراس ما غطيتـــــي .......... ديما الجمة دايره شوطيـــــن

أعيونك أسماح أنكان ما واريتـــــي .......... أوحتا أبنظارات سمحة زيـــــن

حتا أسلوبك سمح كان دويتـــــي .......... وأبكاك حتا أبكاك ماهو شيـــــن

أوما تعرفيه الحقد لو عاديتـــــي .......... وأحداك الدلع أيقول نا مسكيـــــن

أوكنك أنعستي أوعالسرير غفيتـــــي .......... أتغطيك ماما أبوس عالخديـــــن

أوشوفي حياتي نا يا غاليتـــــي .......... أنوض أبهزايب دوم وأبكفيـــــن

أوطشت حليب أتجي كان القيتـــــي .......... أوخبزة اللها في حوشنا يوميـــــن

أونمشي أنشير نين طارت نيتـــــي .......... وأندفها مرات عالكرعيـــــن

وأنروح أنلاقي أمطوحة صونيتـــــي .......... يارز يا أمقطع أويا بازيـــــن

أوفاليل ديما الكارطة سهريتـــــي .......... كل يوم عكرة أفطرح يا طرحيـــــن

ملك أومالي ما أيغرك صيتـــــي .......... أبوادي أوفينا الطبع نقاريـــــن

أوما تحملي تهزيب كان أخطيتـــــي .......... أولا تعرفي تعصيد لا تعجيـــــن

أولا تعرفي الناموس لا حقيتـــــي ......... وين ما عليك أيهد بالميتيـــــن

نا ننصحك حتا أولو ما أرضيتـــــي .......... تنسي غلايا خيرلك بعديـــــن